snorrinn

Fluttur!

2006-09-25T01:38:00.000Z

Mikið rosalega er ég fluttur!

Nýju heimkynnin!

Afsakið hlé

2006-09-11T10:49:00.000Z

Helstu hápunktar síðustu daga.

Stjáni bró heimsótti höfuðborgina. Það er orðið ansi fátítt. Ég er farinn að hafa nettar áhyggjur af blygðunarlausri ást hans á landsbyggðinni. Stjáni tók þessa mynd sjálfur. Hann var að skoða símann minn og fannst ógurlega sniðugt að geta séð sjálfan sig í smáskjánum.

Mannvitsbrekkan sem á og rekur húsið sem m.a. hýsir XFM, KissFM, Skjá 1 er efni í stóra og viðamikla rannsókn. Hann er sjálfskipaður þúsundþjalasmiður, er alltaf að spara hundraðkallana með því að gera hlutina sjálfur, en þegar upp er staðið er kostnaður við lagfæringar farinn að hlaupa á hundruðum þúsunda. Þetta afrekaði hann á dögunum þegar verið var að steypa sökku undir einhverja bévítans súlu. Ég veit ekki ennþá hvert eiginlegt hlutverk súlunnar verður, en karlinn sló upp þessum fína fína steypuramma...sem gaf sig nánast um það leyti sem steypubíllinn kom inn á bílaplanið. Hann lét það nú ekki slá sig út af laginu. Það var nú eiginlega bara heppni að steypan skyldi ekki finna sér leið út á bílaplan og festa þar ónefndan fólksbíl um ókomna tíð. Starfsmenn hússins, og gestir, njóta nú þessa framúrstefnulega listaverks, sem er staðsett við aðalinnganginn, og líklega má taka þann pól í hæðina að í hvert sinn sem maður gengur inn eða út er maður minntur á uppruna sinn og þá hörku sem einkennir þjóðina á landinu bláa...forfeður okkar þurftu jú að berjast við náttúruöflin af miklum þrótti.

Íslendingar hafa sett ný viðmið í netkosningum. Héðan í frá hljóta öll viðmið í netheimum að vera kosningaþátttakan í Rockstar Supernova og sú skemmtilega staðreynd að íbúar Hawaii eru 12 milljónir. Þjóðin er að missa sig...og þá er í rauninni enginn undanskilinn. Ég stend mig að því að rýna í líkamstjáningu þremenninganna sem hafa gæfu og framtíðaráætlanir keppenda í hendi sér og hef komist að þeirri niðurstöðu að Gilbey Clarke er greindarskertur. Sá eini þremenninganna sem líklegur er skrafs og ráðagerða er Jason vinur minn. Annars er þetta allt saman farið að snúast upp í andhverfu sína. Gamla góða keppnisskapið segir manni að Magni verði að vinna þetta, í þeirri von að heimsbyggðin átti sig á takmarkalausum hæfileikum fámennrar þjóðar á norðurhjara, en hins vegar hefur hann ekkert í þessa hljómsveit að gera. Ég er alveg tilbúinn til að viðurkenna virðingu mína fyrir afrekum þremenninganna, mismikla reyndar, en Supernova er drepleiðinleg hljómsveit. Ég myndi frekar vilja hlusta á upptöku úr vinnslusalnum í frystihúsinu á Dalvík heldur en að sitja undir heilli plötu af þessum ósköpum.

Stundum þarf ekkert rosalega mikið til að gleðja mann!

Getraun þáttarins...ég skal hundur heita ef hún reynist ekki erfiðari en sú síðasta!

Úr hvaða kvikmynd eru þessi orðaskipti...

- Just how bad is it?
- It´s a fire. All fires are bad.

Fóru...

2006-08-19T23:03:00.000Z

...allir Íslendingar í heiminum niður í miðbæ Reykjavíkur? Ég var þarna á ferðinni um kaffileytið og þar sem fjöldinn hamlaði talsvert för fór þetta í taugarnar á mér. Komst að því í eitt skipti fyrir öll að þegar karlmenn taka sér stjórnunarstöðu fyrir aftan barnakerru dettur heili þeirra úr sambandi. Þeir virðast halda að þeir öðlist einhvers konur ofurhæfileika, t.d. að bílar og fólk komist hreinlega í gegnum bæði þá sjálfa og allt sem þeir snerta. Þeir taka sér líka mjög gjarnan biðstöðu úti á miðri götu, jafnvel á miðri gangbraut, sem er hvorki líklegt til vinsælda né afreka. Líklega er það þessi sérstæða handstaða við barnakerruýtingar sem hefur hamlandi áhrif á blóð- og súrefnisflæði til heila karlmannsins, sem er umhugsunarvert í ljósi þess að í sumum tilfellum er toppstykkið ekkert rosalega orkufrekt til að byrja með! Handstöðukenningin fær byr undir báða vængi þegar tekið er tillit til þess að svipaður greindarskortur gerir stundum vart við sig þegar karlpeningurinn ýtir innkaupakerru á undan sér.
Það er reyndar svolítið fyndið að það er ekki nema við hátíðleg tækifæri sem karlar virðast sjá einhvers konar tilgang í því að taka að sér stjórn barnakerra. Þetta er einhvers konar trend. Kannski eitthvað svipað og grilleinokunin...nema að grilltaktarnir eru hvorki daga- né árstíðarbundnir á nokkurn hátt. Það er heilsársmisskilningur.

Maður rekst á margt sérkennilegt og skemmtilegt í netheimum. Rambaði einhverra hluta vegna inn á heimasíðu fyrirtækisins D3. Ekkert merkilegt við það í sjálfu sér. Þannig. Komst hins vegar að þeirri niðurstöðu að þetta fyrirtæki hlýtur að eiga met í fjölda millistjórnenda. Í starfsmannatali eru 20 manns. Í þessum hópi eru (í handahófsröð) framkvæmdastjóri, fréttastjóri, vefstjóri, tæknistjóri, þróunarstjóri, efnisstjóri (sem ég held örugglega að sé vinkona Stjána bró), þjónustustjóri, verkefnastjóri og síðast en ekki síst sölu- og markaðsstjóri. 9 stykki! Það gerir 45% starfsmanna ef mér skjöplast ekki! Magnað!

Fann mynd af helsta afreki Tommy Lee í háskóla. Hann settist jú á skólabekk á gamals aldri og að sjálfsögðu var gerður úr því raunveruleikaþáttur eins og þeir gerast bestir. Ég sá þennan þátt auglýstan á einhverri stöðinni hérna heima, þannig að það fer að styttast í að við fáum að njóta herlegheitanna. Fáum sögum fer af námsárangri Tómasar litla, sem í sjálfu sér kemur ekkert sérlega mikið á óvart, en hins vegar lét hann til sín taka í skólahljómsveitinni!

Sá Elton John vera að belgja sig í einhverjum spjallþætti fyrir skemmstu. Ég er ekki mikill aðdáandi Eltons, sumt sem hann gerði snemma á ferlinum er ágætt, en þegar allt kemur til alls finnst mér hann óttaleg lofthæna. Það var kannski þess vegna sem ég fór að leita að mynd af manninum stunda þá iðju sem hann staglaðist á í téðu viðtali að hann stundaði mikið. Tennis.

Ég hélt í smástund að ég væri búinn að finna galla á Google. Ég var að leita að mynd af Elton John í tennis og fékk bara einhverja dýralífsmynd! Sá fyrir mér að ég gæti grætt fúlgur fjár með því að hóta stofnnördunum tveimur að opinbera þennan galla. Svo áttaði ég mig á því að Google var ekkert að klúðra málunum. Þetta er náttúrulega bara rostungurinn Elton með tennisspaða!

Þessi mynd gleður mitt geð!

Bleikskyrtungurinn er alveg með þetta! Hann hefur líklegar verið rétt nýbúinn að sleppa höndunum af barnakerrunni. Súrefnið ekki alveg farið að skila sér upp á efri hæðina! Ég þori að veðja að hann hefur valið sér þessi föt sjálfur!

Að lokum...getraun þáttarins.

Úr hvaða bíómynd eru þessi orðaskipti?

- Is your mommy here?
- No, sir. Actually, she´s out at the market buying Pampers for all us kids.

Þá byrjar það...

2006-08-19T00:29:00.000Z

Leiktíðin í ensku úrvalsdeildinni í knattspyrnu hefst um helgina. Úpps. Um leið og ég skrifaði orðið "knattspyrnu" rifjaðist upp pistill úr ranni hins fróma Karls Th. Birgissonar, sem birtist í Fréttablaðinu, að mig minnir, fyrir skemmstu. Hann er ekki sáttur við þetta orð, knattspyrna. Hann vill að á Íslandi sé talað um fótbolta, enda sé knöttur eitthvað allt annað en hið kringlótta dáleiðslubeð sem milljónir á milljónir ofan fylgjast með í viku hverri og byggja jafnvel lífsskoðanir sínar að miklu leyti á. Ég er ekki alveg sammála. En það er svo sem allt í lagi.

Í aðdraganda leiktíðarinnar í enska rakst ég á ansi hreint magnaða ljósmynd. Hún hefur valdið mér talsverðu hugarangri.

Er Giggs að æfa knatttækni í Blómavali? Hvað er þessi trjágrein að flækjast fyrir honum? Eða væri kannski nær að spyrja hvað Giggs er að gera í grennd við þessa grein? Er fræðilegur möguleiki að verðmiðinn sé á trénu...eða er þetta kannski tilkynning um að búið sé að úða á greinina skordýraeitri?

Hér er frétt vikunnar. Það þarf ekkert að ræða það frekar.

Tjahhhh...

2006-08-18T17:19:00.000Z

Assgoti líst mér vel á ráðningu Friðriks Inga í starf framkvæmdastjóra KKÍ. Reynsla hans og skynsemi, að ógleymdri takmarkalítilli greind, á eftir að koma að góðum notum. Hann lengi lifi!
Friðrik er tónviss maður með afbrigðum, hefur góðan smekk og á afrekaskránni er m.a. framkoma í Músíktilraunum! Mikið hefði ég viljað sjá hljómsveitina Splendid, með Friðrik Inga og Dodda litla, öðru nafni Love Guru, innanborðs á sviði! Leiðir þeirra lágu reyndar fyrst saman í Surprise Of the Century, sem er líklega best nefnda hljómsveit Íslandssögunnar!
Annars geta hljómsveitarnöfn ráðið ansi miklu um árangur erfiðsins. Hljómsveitin Feedback hefði líklega ekki náð langt. Hvað þá Hype. En U2...það er allt annar handleggur. Wicked Lester er reyndar ágætt hljómsveitarnafn, en Kiss er ennþá betra. Steðjabandið var kannski líklegt til stórræðna, en Stuðkompaníið var samt alltaf líklegra. Mér finnst reyndar Leaves alveg magnað hljómsveitarnafn. Veit ekki af hverju. Supernova er glatað.

Plötuumslög eru líka býsna mikilvæg. Þetta hefur reyndar breyst svolítið með tilkomu tækninnar. Nú gónir maður ekki eins svakalega á plötuumslagið á meðan maður hlustar, þessu er bara frussað inn í tölvuna og umslagið lagt til hliðar. Umslögin misstu líka svolítinn sjarma þegar þau urðu að þessum blessuðu bæklingum sem fylgja geisladiskunum. Hugmyndavinnan er allt önnur. Uppröðun laga breyttist líka talsvert með tilkomu geisladisksins. Bubbi Morthens sagði mér það einu sinni að hér í eina tíð hefði einn helsti höfuðverkurinn í kringum útgáfu nýrrar plötu verið lagaröðin, stærsta málið var hvaða lag ætti að vera fyrsta lag á b-hliðinni. Þá var nú öldin önnur!

Hér er samansafn nokkurra hrikalegustu plötuumslaga allra tíma. Tvö þeirra fá sérstaka heiðurstilnefningu...

Það er alveg hreint með ólíkindum hvað Julie er óhamingjusöm á 16 ára afmælisdaginn! Það er engu líkara en að John frændi hafi eitthvað ósiðlegt í huga!

Hvernig datt Freddie þetta eiginlega í hug? Það hefur nú verið lögð talsverð vinna í þetta umslag...þannig lagað...en ætli hann hafi aldrei í öllu ferlinu kveikt á perunni?

Jim Post kemur líka sterkur inn.

Hemmi Gunn, sá mæti maður, fer langt með að eiga versta plötuumslag allra tíma á Íslandi. Gulu smekkbuxurnar og gamla konan! Sólroðinn á Mannakornsplötunni fyrir fáeinum árum var svo hrikalegur að umslaginu var breytt. Það hefur ekki gerst mjög oft hér á litla Fróni.
Á hinum enda spýtunnar er smáskífa sem gefin var út fyrir allmörgum árum. Mig minnir endilega að hljómsveitin hafi heitið Árný...Jón Kjartan frændi man þetta örugglega...en platan hét altént Árný trúlofast. Á plötuumslaginu, á milli þessara tveggja orða, Árny og trúlofast, voru tvær nótur á nótnablaði. Nóturnar Fís og A. Djúpt!
Bestu og/eða verstu plötuumslög allra tíma??? Orðið er laust!

Missti mig aðeins í tónlistarniðurhali í gær. Datt í eitthvert Massive Attack / Portishead / Ennio Morricone-stuð. Glory Box verður með tíð og tíma fært til bókar sem eitt besta lag allra tíma. Það var líka hressandi að rifja upp aðalstefið úr Twin Peaks...úr smiðju meistara Morricone.

Mig langar í reiðhjól. Og bassabox í bílinn. Það vantar "úmfið". Þarf líka að komast til læknis/sjúkraþjálfara/nuddara/kirópraktors/heilara. Öxlin er að drepa mig.
Sem minnir á óbotnanlega fyrripartinn...

Verkur sár í vinstri öxl,
verri þó í hægri mjöðm

Sá/sú sem getur botnað þetta fær millinafnið Snillingur skráð í Þjóðskrá. Sem er ekki að fara að gerast.

Stórsnjallt...

2006-08-17T20:23:00.000Z

...hjá Magna að taka Creep. "What the hell am I doing here...I don´t belong here." Orð að sönnu. Maður veltir því fyrir sér hvort það hafi verið trikk hjá framleiðendum þáttanna að hafa besta söngvarann í hópi þriggja neðstu. Það er gömul saga og ný að óvænt atburðarrás vekur athygli á viðkomandi sjónvarpsþætti, eykur umtalið og þar með áhorfið.

Fiskidagurinn stóð undir væntingum og vel það. Ég hitti fleira frændfólk núna en í fyrra. Ráðstafaði tímanum líka betur. Mesta furða hvað það á miklu betur við mig að vera edrú!

Hafnarsvæðið...Brain Police að spila í Drafnarbrautinni (hvar Jónbi trommari bjó í æsku!) og flugeldasýningin. Hápunktar hátíðarinnar. Í tímaröð.

Hafði vit á því að gista hjá Gissa frænda. Hann er með tækjadellu. Taldi sjö fjarstýringar á stofuborðinu. Á þakinu eru tveir gervihnattadiskar. Bíómyndasafnið hans heillaði mig þó mest. Í stað þess að hvolfa í mig söngolíu, blaðra tóma vitleysu við kunnuga jafnt sem ókunnuga og finna til verkja daginn eftir lagðist ég í bíómyndirnar. Sá nokkrar góðar. Inside Man og 16 Blocks standa líklega upp úr.
Gissur á líka Rambó, ljúfasta Labrador-hund sem ég hef komist í kynni við. Hann er reyndar af dönsku bergi brotinn, hefur þurft að dúsa í einangrun í Hrísey og hvaðeina. Þeir náðu ágætlega saman, Rambó og Tumi. Enda frændur.

Inga Rún kláraði annað reiðnámskeið sumarsins í síðustu viku. Það fer væntanlega að styttast í að hún geri kröfu um að eignast sinn eigin reiðskjóta. Mikið verður gaman þá!

Langþráð...

2006-08-10T19:42:00.000Z

sumarfrí. Loksins. Tímasetningin gæti reyndar talist vafasöm. Veðurútlitið er ekkert sérstakt og svo er farið að styttast ansi hressilega í að enski boltinn fari að rúlla, sem hefur afgerandi áhrif á sumarfríið. Þess verður engu að síður notið af alefli.

Mannlífsrannsóknir Snorrans eru alltaf að leiða eitthvað nýtt og spennandi í ljós. Hraðahindranir hafa stytt mér stundirnar síðustu dægrin. Þær eru ansi merkilegt rannsóknarefni.
Hinar ýmsu tegundir hraðahindrana hafa verið reyndar hér á landi, með misjöfnum árangri. Sikk-sakkið í gamla bænum í henni Reykjavík er stórfenglegt og blómakerin sem sett hafa verið upp hér og þar í tryllingslegri tilviljanaröð gleðja hvorki auga né geð. Í eina tíð þótti líklegt til árangurs að reisa lítil fjöll á akbrautunum miðjum og blindhæðin á Dalvík er gott dæmi um slíkt. Framkvæmdir voru bæði tímafrekar og kostnaðarsamar, heill vinnuflokkur tók sér frí frá hálendisvegagerð til að tryggja að vandað yrði til verksins, og afraksturinn varð skrímsli sem skipti bænum í tvennt. Búsetuskilgreiningin á Dalvík breyttist, allt í einu átti hún ekki lengur við Kaupfélagið...þetta snérist um það hvort fólk bjó utan eða innan við hindrun. Á veturna varð þessi hraðahindrun oftar en ekki illfær og varla nema á færi þeirra sem áttu jeppa og stóra bíla að brölta þar yfir. Fjallið fékk sem betur fer aldrei formlegt nafn, þótt vissulega hefði það verið viðeigandi, og hefur nú verið fjarlægt.
Smærri hraðahindranir hafa oftast skilað þeim árangri einum að stytta manni stundirnar við aksturinn og gera annars tilbreytingalitlar ökuferðir örlítið skemmtilegri. Maður hefur ekkert þurft að hægja ferðina neitt sérstaklega, en þyngdarleysið sem varir í nanósekúndu eða þar um bil hefur haft sitt skemmtanagildi. Nú eru hins vegar komnar á göturnar hraðahindranir sem rótvirka. Loksins. Það er algjörlega ómögulegt að ætla sér að taka þessar á ferðinni. Galdurinn? Minnka kvikindin!

Þegar ég keyrði fram á þessa hraðahindrun á dögunum fékk ég svipaða tilfinningu og ég fékk hérna um árið þegar ég skundaði, einu sinni sem oftar, til vallar með hinu stórmerka knattspyrnuliði Angelica Raiders. Þegar ég sá hobbítana í fyrstu hringavitleysumyndinni nokkrum árum síðar fannst mér þekkja líkamsbygginguna og nokkur andlit aftur, þarna voru andstæðingarnir úr ógleymanlega leiknum mættir aftur! Við Angelica-sveinar hófum leik með bros á vör og töldum líklegt að við myndum vinna með nokkurra tuga marka mun. Minningin er ljúfsár, en ef mér skjöplast ekki unnu hobbítarnir okkur með fjórum. Eða fimm. Þetta var sem betur fer æfingaleikur.
Ég nálgaðist þessa hraðahindrun af sama hroka. Glotti við tönn og ætlaði að taka þetta á ferðinni. Sem betur fer er Skódinn sterkbyggður og endingagóður. Gangverkið er enn í fínu lagi, þrátt fyrir mikið og gott högg. Ég náði ekki einu sinni að dælda toppinn innanfrá, þrátt fyrir mjög heiðarlega tilraun. Í þessu tilviku skiptir stærðin máli.

Íslendingar eru á löngum köflum óheyrilega fyndin þjóð. Við látum alls kyns vitleysu og siðleysi yfir okkur ganga án þess að gefa frá okkur svo mikið sem stunu, en einu sinni á ári missir stór hluti þjóðarinnar vitið. Þetta virkar á svipaðan hátt og ctlr-alt-del-fídusinn á tölvunni. Það þurrkast allt út og verður að endurræsa allt heila klabbið. Tekjubirtingin hefur bara þessi áhrif. Mér er alveg sama þótt eitthvert fólk hafi milljónir og jafnvel tugi milljóna í mánaðarlaun. Verði því að góðu. Vonandi eykur auðurinn lífsgleði þess og þrótt. Mér verður frekar hugsað til þeirra sem ekki ná endum saman, þrátt fyrir framlag sitt til þjóðarbúsins. Það er stærra áhyggjuefni en þetta milljónabrölt.

Ég nenni eiginlega ekki að nöldra um málfar á opinberum vettvangi, en mér líður stundum eins og ég hafi misst af því þegar ákveðið var að breyta tungumálinu til hins verra, lögleiða málvillur og almennt bull og hætta að gera þá kröfu að fjölmiðlafólk gæti komið frá sér óbrengluðum setningum á réttu og skiljanlegu máli. RÚV og Mogginn eru reyndar í algjörum sérflokki og standa alltaf fyrir sínu, en aðrir miðlar eru flestir algjörlega úti á túni. Sumar fréttir NFS skil ég hreinlega ekki; orðalag, málvillur og misnotkun orðatiltækja eru með ólíkindum og málvillurnar sem vaða uppi t.d. í Fréttablaðinu eru óskiljanlegar með öllu. Svo ekki sé minnst á auglýsingarnar. Maður lifandi.
Ekki reyna að halda því fram að þetta sé "þróun tungumálsins". Það er þvaður.

Fiskidagurinn mikli um helgina! Það ætti í rauninni ekki að þurfa ástæðu sem þessa til þess að heimsækja Dalvík, sem er Paradís á jörð! En tilefnið, þ.e.a.s. Fiskidagurinn, er ærið. 35 þúsund manns í fyrra. Held ég. Ókeypis fiskur og aðrar veitingar að ógleymdum óborganlegum skemmtiatriðum. Ekki gleyma fiskisúpukvöldinu, föstudagskvöldinu, sem er ómissandi hluti ævintýrisins. Flest hús bæjarins opin gestum og gangandi og rjúkandi súpa á boðstólum. Þetta er snilld sem hverjum Íslendingi er nauðsynlegt að upplifa. Þetta er svo magnað að ég fórna Morrissey-tónleikunum! Það er svona svipað og að sleppa því að vera viðstaddur eigin fæðingu!

Að lokum...getraun þáttarins. Af hverju er þessi mynd?

Kverúlantar!

2006-07-24T21:58:00.000Z

Hvað er málið með þessar mannvitsbrekkur sem ryðjast fram á ritvöllinn í þeim tilgangi einum að gera lítið úr afrekum ungs íslensks söngvara í sjónvarpsþætti sem trilljónir horfa á í hverri viku? Það má vel vera að meðlimir Supernova séu svona og hinsegin, en afrek þeirra eru engu að síður talsverð. Þótt íslenskir skríbentar, sem varla ná andanum fyrir eigin táfýlu og geta í mesta lagi látið sig dreyma um að þekkjast á næstu Trek-samkomu, þekki ekki Guns´n´Roses, Mötley Crüe og Metallica frá útrunnum 1944-réttunum í ísskápnum sínum er ekki þar með sagt að þeir eigi að leyfa sér að losa um svekkelsið vegna eigin getu- og framkvæmdaleysis með svona leiðindum. Magni er bara að gera frábæra hluti (nóta bene fyrir framan manninn sem plokkaði bassann á ...And Justice For All!!!) og það ber að samgleðjast kappanum. Hann á ekkert skilið annað en virðingu og fölskvalausar hamingjuóskir.

Stundum keyrir fyrirhyggjan um þverbak. Af hverju eru alltaf einhverjir misvitrir einstaklingar, ýmist reyndar þjóðkjörnir eða nánast sjálfskipaðir, að segja okkur hvað okkur er óhætt að horfa á og hvað ekki. Þótt eitthvað sé aðgengilegt til áhorfs er þá þar með sagt að landsmenn allir horfi af endalausum áhuga? Nú er farið að agnúast eitthvað út í það að Skjárinn bjóði upp á klám, eða erótík, eða hvað sem hver vill nú kalla þetta. Til þess að komast í klámið þarf sérstakt aðgangsorð (er mér sagt!!!), og auðvitað er hverjum og einum í sjálfvald sett hvort hann/hún horfir eða ekki. Samt öskra púritanar þessa lands úlfur, úlfur. Þetta er svipað og með boxið. Auðvitað á að lögleiða hnefaleika á Íslandi, annað er barbarismi. Ég hef samt minni en engan áhuga á að stunda hnefaleika. Tjái mig ekki frekar um klámið!

Fór á völlinn í gær. Valur - Víkingur í bikarnum. Hefðu betur sleppt því.

Myndin var sem betur fer tekin fyrir leik. Á henni sést greinilega sá friðarljómi sem umlykur viðfangsefnið og kom í veg fyrir að hann missti sig endanlega yfir knattspyrnuleik gærkvöldsins. Úrslitin fyrir norðan voru nú heldur ekki til að lyfta geðinu. Þrætti svo við Tryggva Guðmunds í dag, flutti um það langa og lærða tölu hversu arfavitlaus hugmynd það væri að sameina KA og Þór. Kári frændi, oftar en ekki kenndur við Naglbítana, var sammála mér. Enda að norðan. Á nokkra leiki með KA á ferilskránni.

Það eina sem kom í veg fyrir martraðir og endalaus leiðindi í gær var veðrið og stutt stopp við Perluna. Höfuðborgin skartaði sínu fegursta og útsýnið var hreint út sagt magnað.

Þetta fer bara langleiðina með að minna mann á Eyjafjörðinn!

Menn eiga ekki...

2006-07-20T16:22:00.000Z

...að opinbera dómgreindarskort sinn svona á opinberum vettvangi!

Þarf annars að fara að vinna í golfsveiflunni. Og verða mér úti um reiðhjól.

Daprast seldirðu djönkið...

2006-07-18T19:19:00.000Z

...púra drasl já hreinræktað eðalfeik
(Magnús Þór Jónsson, 2000)

Sumir geta þetta, kunna þetta og hreinlega mega þetta. Aðrir ekki.
Rakst á þessi tvö skilti á helgarröltinu.

Tungu vorri er stefnt í voða.

Helgarnar...

2006-07-17T17:52:00.000Z

...eru of stuttar. Þegar ég verð forseti verður það mitt fyrsta embættisverk að lengja þær. Jafnvel snúa þessu alveg við. Ég er ekki alveg búinn að hugsa þetta.

Undarlegur fjandi að allt í einu brast á með vísi að sumarveðri í gær. Maður veit eiginlega ekki alveg hvernig maður á að fara með slíkar gjafir. Fátt er þó huggulegra en að grilla í sólskini og smella sér svo á völlinn. Ekki skemmdi það nú fyrir að rauðklæddir Friðrikssveinar höfðu sigur á ríkjandi/verðandi Íslandsmeisturum. Sat við hliðina á einum fræknasta framherja íslenskrar knattspyrnusögu, hinum eina sanna Hödda Magg, og hann tók tíðindum kvöldsins af stóískri ró. Það eykur talsvert á ánægjuna að hafa sér við hlið knattfróðan mann sem hægt er að tala við án þess að hreinlega sjá froðuna vella út úr eyrunum.

Tvö atriði sem vert er um að geta, bæði til þess að svara fjölmörgum spurningum og ekki síður til þess að forðast þrálátan misskilning. Fyrir það fyrsta...X-FM er ekki á hraðri leið til glötunar. Vissulega hafa vindar blásið síðustu dægrin, en þó gætu á næstu dögum gerst hlutir sem bera öll einkenni þess að koma talsvert á óvart. Stöðin er að stækka og dafnar ágætlega og þess verður ekki langt að bíða að hún teygi anga sína enn lengra en hún gerir í dag. Í öðru lagi...ég er ekki að snúa mér aftur að íþróttafréttamennsku. Ég hef fengið tilboð, en mig hreinlega langar ekki í þennan geira aftur. Ég á ekki von á því að sú afstaða mín breytist neitt á næstunni. Ég hef sagt það áður og segi það enn; íþróttafréttamennska á Íslandi er að afskaplega mörgu leyti á villigötum. Aðgengi og "fréttaneysla" almennings hefur breyst ansi mikið á síðustu árum, en þessu breytta landslagi hafa ekki fylgt breytingar á íþróttafréttum. Það eru líka takmörk fyrir því hvað maður nennir að taka sama viðtalið oft. Það er skemmtilegra að upplifa íþróttirnar af hluttekinginu, innan skynsemismarka, og á eigin forsendum. Ég hugsa að ég myndi m.a.s. sleppa því að lýsa leikjum í enska boltanum ef það væri ekki svona fjandi vel borgað!

Meistari Morrissey er á leiðinni til landsins til tónleikahalds. Megi Grími Atla, sem ber ábyrgð á komu snillingsins, auðnast öll sú gleði og hamingja sem hann og hans nánustu geta höndlað. Það er stór misskilningur að Morrissey njóti aðallega hylli vegna afreka sinna með The Smiths. Hann er reyndar farinn að mildast á efri árum og er farinn að spila nokkrar Smiths-perlur á tónleikum, segist vera kominn yfir það andlega sjokk og þau leiðindi sem hann upplifði á meðan hljómsveitin var starfandi (!), en einherjaplöturnar hans eru öngvu síðri en Smiths-verkin. Ekki mikið síðri alla vega. Ringleader Of the Tormentors verður pottþétt á listanum yfir plötur ársins. Höddi Magg, svo enn og aftur sé vitnað í þann mikla spekúlant, sagði á sínum tíma að til þess að gera betri plötu þyrfti að grafa upp nokkra ágæta menn sem bera eftirnafnið Wilson!

Stundum...

2006-07-13T18:40:00.000Z

...veltir maður því fyrir sér hver tilgangur ákveðinna fjölmiðla er nákvæmlega og hvað fjölmiðlafólki gengur til með umfjöllun sinni. Í nýjasta hefti hins kunna fagtímarits Séð og heyrt er fjallað um nýafstaðna Hróarskelduhátíð í máli og myndum. Umfjöllunin er svo sem hvorki fugl né fiskur þannig, myndin af Óla Palla veitir reyndar gleði og vellíðan, en tvær aðrar myndir gera það að verkum að það er ekkert mark á þessu takandi.
Annars vegar þessi...

Í myndatexta er fjallað um að Dave Grohl og félagar í Foo Fighters hafi verið í miklum ham, sem verður að teljast yfirnáttúrulega vel af sér vikið. Foo Fighters voru nefnilega ekkert að spila á Hróarskeldu, frekar en Brian Wilson sem birtist á mynd á næstu síðu í blaðinu.

Magni rúllaði þessu upp í Rockstar, var eiginlega bara besti karlsöngvarinn og þá er öll hlutdrægni lögð til hliðar! Ástralakvikindið þarna í lokin stóð sig svo sem ágætlega, en það er samt eitthvað við hann sem gengur ekki alveg upp. Hins vegar er algjörlega morgunljóst hver vinnur þetta. Dímónska daman, sem á löngum köflum virðist ná tengslum við æðri máttarvöld, er gjörsamlega með þetta.
Heyrði þá kjaftasögu að Tommy Lee og Jason Newstead séu með Chihuahua-hundana sína með sér hvert sem þeir fara. Þessi saga gerði það að verkum að þeir hækkuðu talsvert í áliti hjá mér. Fannst ég líka sjá glitta í flugvélaúr á hendi Magna. Það ber vott um greind, gáfur og góðan smekk að ganga með slíkt úr.

Kannski var þetta alls ekkert flugvélaúr, en hann fær þó eitt rokkstig aukalega þar til annað kemur í ljós.

Það habbðist!

2006-07-10T19:12:00.000Z

Ítalskur sigur var fyllilega verðskuldaður og óskaplega sætur að auki. Hafi einhver efast um snilli Marcello Lippi ætti sá hinn sami nú að hafa sannfærst í eitt skipti fyrir öll. Maðurinn er einfaldlega snillingur og ef ég væri forseti ítalska knattspyrnusambandsins myndi ég bjóða honum grilljón grilljónir í laun, undanþágu frá skatti og vindlakassa frá Kúbu fyrir að skrifa undir nýjan samning.

Lippi er ansi merkilegur fír. Hann er af alþýðufólki kominn, kommúnisti að upplagi og fyrirleit allt sem tengdist markaðshyggju og söfnun auðs á fárra hendur. Fyrir margt löngu var hann að dandalast eitthvað í pólitík og var talinn vonarstjarna ítalskra kommúnista, en með tíð og tíma fjarlægðist hann marxískar kenningar og sá ljósið. Karl faðir hans var hins vegar Stalínisti þar til yfir lauk og Lippi hefur sagt frá því að þegar hann tók við Juventus á sínum tíma hafi hann farið að gröf föður síns til að biðja gamla manninn afsökunar á því að stýra knattspyrnuliði sem veltir milljónum, ef ekki milljörðum, og heldur úti öflugu markaðsstarfi. Á þjálfaraferlinum hefur hann afrekað nánast allt sem hægt er að afreka og skrautfjöðrina nældi hann auðvitað í hattinn í Berlín. Það er ekki beinlínis hlaupið að því að sameina sundraða knattspyrnuþjóð þar sem hver skandallinn rekur annan.

Ég skil ekki alveg kverúlantana sem gráta franskan ósigur. Þeir voru einfaldlega ekki nógu góðir til að vinna leikinn, misstu reyndar Vieira og Henry af leikvelli vegna meiðsla og Zidane sá um sig sjálfur. Nú þarf að ráðast í það vandasama verk að fylla skörð manna á borð við Zidane, Thuram og Makelele. Það læðist að manni sá grunur að næstu ár verði franska liðinu ansi mögur. Þjóðverjarnir verða hins vegar sterkir í nánustu framtíð, vonandi ber Bæjaraklíkan gæfu til þess að ríghalda í Klinsmann og þá er Evrópumeistaratitillinn eftir tvö ár nánast í húsi.

Zinedine Zidane. Hvað er hægt að segja? Besti knattspyrnumaður heims mörg undanfarin ár hvarf af stóra sviðinu á eftirminnilegan hátt. Með lortinn í buxunum. Það sem eiginlega er verst við þetta er að þessi stórundarlega hegðun hans skyggir nú á einn flottasta knattspyrnuferil sem um getur, ógleymanlega leiki og óviðjafnanleg mörk. Zidane er svo miklu meira en knattspyrnumaður, verandi af alsírskum ættum hefur hann verið nokkurs konar sameiningartákn sundraðrar og á löngum köflum ansi hreint ruglaðrar þjóðar. Það kannski segir sitt um stöðu hans og takmarkalausa aðdáun alls knattspyrnuáhugafólks að strax eftir leik var fólk farið að fyrirgefa honum og leita skýringa á þessari undarlegu hegðun. Flestum öðrum knattspyrnumönnum hefði verið sparkað út af sakramentinu af fítonskrafti. Zidane ætlar að skýra mál sitt á allra næstu dögum og allar þessar vangaveltur um hvort Materazzi hafi kallað hann hryðjuverkamann eða svívirt móður hans eru gagnslausar.

Til að ljúka nú HM-vangaveltum...Sýn stóð sig með sóma, eins og við var að búast. Umgjörðin hin ágætasta og ekki undan neinu að kvarta. Ekki einu sinni þegar AB sagði að staðan í úrslitaeiknum væri jöfn-jöfn. Ég hefði hins vegar ekki látið mér detta það í hug að borga 14 þúsund kall fyrir pakkann...og fá svo fjóra mikilvægustu leikina í opinni dagskrá.

Getraun þáttarins tengist ferðalagi helgarinnar. Hvar er þessi mynd tekin?

Undarlegur...

2006-07-07T16:11:00.000Z

...fjandi hvað hlutir í daglega lífinu koma manni alltaf þægilega á óvart. Líklega minnkar skemmtanagildið talsvert þegar atburðir líðandi stundar læðast ekki lengur aftan að manni. Sigurjón M. Egilsson er orðinn ritstjóri Blaðsins. Ég misskildi þetta reyndar fyrst og skildi ekki alveg undrunarsvip þeirra sem fluttu mér fréttirnar. Ég tók þetta óvart fyrir Fréttablaðið, sem hefði nú bara verið "eðlilegt" í sögulegu samhengi, en þetta er hins vegar með því undarlegra sem gerst hefur lengi. Það var kannski þetta sem Eiríkur Jóns átti við þegar hann sagði í blaðaviðtali í vikunni að það væru miklar hræringar og spennandi tímar framundan í íslenskum fjölmiðlum. Ég hélt að hann væri kannski kominn með sjaldgæfan hitabeltissjúkdóm sem hefur neikvæð áhrif á greind og rökhugsun, en líklega vissi hann alveg hvað hann söng. Allt er í heiminum hverfult. Er stórt, flókið og útpælt plott í gangi?

Þetta eru Ítalíumeistarar Juventus að fagna síðasta meistaratitli, eða Scudetto. Það glittir þarna í nokkra verðandi heimsmeistara og ekki má gleyma því að ókleifur múrinn í miðju Juve-varnarinnar kemur heldur betur við sögu á sunnudaginn, Cannavaro gegn Thuram. Nú bendir hins vegar flest til þess að La Vecchia Donna neyðist til að skila meistaraskildinum og verði dæmd niður um deild. Svona geta nautheimskir stjórnendur skitið á sig fyrir allan peninginn. Lögmaður Juve var að lýsa því yfir að félagið sætti sig við að leika í Serie B á næstu leiktíð og líklega byrjar liðið með 15 stig í mínus. Thuram og Del Piero eru meðal þeirra sem hafa lýst því yfir að þeir yfirgefi ekki herbúðir, en hins vegar ætla búðingar á borð við Nedved og Emerson að leita á önnur mið. Didier Deschamps verður líklega ráðinn þjálfari liðsins í stað Fabio Capello sem lagði á flótta.

Hef lagt leið mína í kvikmyndahús í tvígang á tiltölulega skömmum tíma. Ekki fréttnæmt í sjálfu sér og myndirnar misjafnar, en mikið rosalega er óþolandi að sýningar hefjast ekki fyrr en tuttugu mínutum á eftir áætlun. Mynd sem sett er á dagskrá kl. 22.20 er að hefjast kl. 22.37. Þetta er fáránlegt. Endalausar auglýsingar og sýnishorn úr öðrum kvikmyndum. Er ekki hægt að rúlla því drasli af stað 17 mínútum fyrr og hefja bíómynd kvöldsins kl. 22.20? Íslenskt hugarfar kristallast svolítið í þessari "seinkun". Við getum aldrei drullast til að mæta neitt á réttum tíma...og það kemur ekki að sök. Þegar við förum í bíó vitum við að myndin byrjar ekki fyrr en undir miðnætti hvort eð er! Nenni ekki að ergja mig á þessu fjárans hléi líka. Það er samt eitthvað það asnalegasta sem til er.

Það fer að styttast í að frumburðurinn fái sérstakt leyfi yfirvalda til að þróa aksturshæfileikana. Bílprófið fylgir í flestum tilfellum í kjölfarið og það er ekki laust við að örli á kvíða. Það er betra að búa sig undir þetta með hæfilegum fyrirvara. Ég er ekki alveg á þeim buxunum að fórna Skódanum í þetta hættulega verkefni. Er búinn að finna hinn fullkomna bíl til verksins. Gallinn er sá að hann býr í útlöndum, líklega myndi kosta sitt að fá hann hingað heim og svo er hann bara svo fjandi flottur að ég myndi líklega ekki tíma honum heldur í þetta. Þetta er sannkölluð glæsibifreið af tékkneskum ættum...reyndar tékkóslóvakískum ef út í það er farið.

Hvað sagði ég?

2006-07-04T23:02:00.000Z

Nirvana! Ég er sannfærður um að hann getur breytt vatni í vín.
Cannavaro sannaði líka snilli sína, enda langbesti varnarmaður heims.

Þetta var yndislegt. Ítalía - Frakkland í úrslitum og rétt eins og til forna verður herfangið flutt til Rómar.

Lykilatriði!

2006-07-04T14:49:00.000Z

Ef Ítalir ætla að vinna Þjóðverja verður Lippi að setja Guð inná.

Þetta er algjört lykilatriði. Ítalir þurfa á honum að halda. Ég hélt að þetta væri komið þegar hann var settur í byrjunarliðið gegn Áströlunum, en Lippi breytti enn og aftur til gegn Úkraínumönnum. Líklega hefur harmsagan um Gianluca Pessotto haft sín áhrif, Del Piero er sagður hafa tekið daprar fréttir af góðvini sínum nærri sér.

Það er orðið til siðs hér innanhúss að spila leiki dagsins á HM í PS2. Komið hefur í ljós að spádómsgildið er nákvæmlega ekkert. Yfirleitt er erfitt að komast að. Þessir tveir eru aaalltaf að spila!

Reynir hefur tekið átakanlega litlum framförum þrátt fyrir fáheyrða ástundun, en Sissi er hins vegar orðinn nokkuð erfiður.
Við Skúli spiluðum Þýskaland - Ítalía til að átta okkur betur á stöðunni. Skúli hefur aldrei tapað leik. Fyrr en nú! Ítalía vann í vítaspyrnukeppni. Buffon varði allar spyrnur Þjóðverjanna! Veit á gott.

Ég er farinn að hafa talsverðar áhyggjur af fréttamannastéttinni. Meðalaldurinn fer snarlækkandi, sem auðvitað má skýra með sumarafleysingum, en það sem er öllu verra er að málvitundin virðist algjörlega vera að hverfa. Þetta er ekkert sérstaklega ánægjuleg þróun. Í Fréttablaðinu var á dögunum stutt viðtal við ónefndan kylfing, sem vegna meiðsla hafði hætt keppni í móti á erlendri grundu. Haft var eftir kylfingnum að hann hefði verið að ganga niður brekku þegar hann meiddist á fóti! Í einhverri auglýsingunni segir "langar þig og vinunum"! Sumar fréttir ljósvakamiðlanna eru nánast óskiljanlegar, sem er allt að því ófyrirgefanlegt í ljósi þess að fólk (fréttamenn- og konur) á að geta lesið þetta yfir í rólegheitunum og leitað aðstoðar ef með þarf. Þetta er farið minna óþægilega á smásögu eftir Kurt Vonnegut.

Rak augun í skemmtilegan hlut í umferðinni um daginn. Lenti á eftir bíl sem ekki fór á milli mála að ætlað var það hlutverk að keyra brúðhjón á milli staða (þekki þetta ekki, hef bara heyrt sögur!), sem er svo sem ekki í frásögur færandi. Það sem hins vegar var óvenjulegt var að brúðurin sat sjálf undir stýri. Gott ef mannsefnið sat ekki í farþegasætinu. Mér fannst þetta bráðfyndið. Mundaði símann til myndatöku, mjög lymskulega að sjálfsögðu, sem skýrir myndgæðin. Ég veit ekki hvort þetta sést almennilega á myndinni.

Á skólabekkinn!

2006-06-28T18:11:00.000Z

Var að fá inngöngu í Endurmenntun HÍ. Rekstrar- og viðskiptafræði, nám með starfi. Eitthvað verður maður að gera við þessar takmarkalitlu gáfur! Þetta var nú eiginlega löngu tímabært. Afrek mín á háskólastigi dreifa sér nokkuð jafnt á fjóra fagra haustdaga 1989. Eftir að hafa horfið frá upphaflegri hugmynd The Three Amigos um að nema laganna fræði skráði ég mig í félags- og fjölmiðlafræði. Offi og Berti fóru í lögfræðina. Í dag er Offi jarðfræðingur og Berti er sálfræðingur. Ekki orð um það meir. Ég fékk inni á Garði og hvaðeina. Kom m.a.s. snemma, svona eins og sveitamanna er siður, og henglaðist á gömlu Stjörnunni fram að fyrsta skóladegi. Nágrannir mínir fóru að tínast inn hver á fætur öðrum og þetta var ansi skrautlegur hópur. Tvær lessur á lopapeysum sem skildu ekkert í því að ég vildi ekki reykja hass með þeim, sænskur læknanemi sem fann Íslandi og Íslendingum gjörsamlega allt til foráttu og Indverji sem byrjaði á því að rífa allt út úr herberginu sínu, mála og endurskipuleggja allt frá a til ö. Ég flutti út á fimmta skóladegi, strax eftir fyrsta fjölmiðlafræðitímann. Mér fannst þetta glatað. Fékk reyndar ansi freistandi tilboð um fulla vinnu á Stjörnunni á sama tíma og það hafði sín áhrif. Flutti af Garði og fór að leigja með Gulla Þór í Barmahlíðinni.
Ég held að þetta verði bara ágætt.

Velti því aðeins fyrir mér um helgina hvort ég væri algjörlega búinn að missa það. Þetta er það sem ég var að sýsla...svona mestmegnis...á föstudags- og laugardagskvöld.

Þetta er reyndar þrælskemmtilegt...www.flyordie.com...en samt er svolítið glatað að eyða þessum sérvöldu kvöldum í þetta. Það læddist að mér sá grunur að sjónvarpsstjórar þessa lands væru í keppni um helgina..."hver getur boðið upp á ömurlegustu dagskrána...og komist upp með það". Þess vegna kallaði snókerinn alltaf á mig aftur og aftur.

Það læðast alltaf að manni annað slagið áminningar um að árin færast yfir. Sú nýjasta...barnið mitt er að búa sig undir það að fara í framhaldsskóla. Ég er samt ekkert svo gamall...ég eignaðist hana þegar ég var nýorðinn 15!

Undarlegt...

2006-06-21T21:57:00.000Z

...þetta líf. Maður heldur að hlutirnir séu svona, en við nánari skoðun kemur í ljós að þeir eru hinsegin. Þetta eru búnir að vera undarlegir dagar, en uppspretta undarlegheitanna verður hér látin liggja á milli hluta. Sjálfsskoðun er holl, ekki síst ef hún leiðir af sér hugarfarsbreytingar og jafnvel það að valinn verður vegur sem öruggt er að liggur til meiri vegsemdar í sem víðustum skilningi.

Heitir þetta ekki fölskvalaus gleði?

Norðanferðin var fín. Það er endurnærandi að renna út á Dalvík. Skódinn er hugsanlega langbesti bíll sem framleiddur hefur verið. Ég hef aldrei verið svona fljótur á milli og ferðaþreytan var nákvæmlega engin. Var að spá í að fara norður aftur og vera viðstaddur endurkomu Stuðkompanísins, en féll frá þeirri hugmynd. Komst að þeirri niðurstöðu að ég væri ekki ómissandi hluti endurupplifunar þessa blómaskeiðs í íslenskri dægurtónlist. Næsta norðanferð er hins vegar löngu komin inn í dagbókina. Fiskidagurinn mikli á Dalvík.
Roger Waters var líka fínn. Reyndar svolítið meira en það. Það eina sem var virkilega pirrandi var að þurfa að standa upp á annan endann í hálfan sólarhring á meðan meistarinn mikli lék ellefu hljómplötur í heild sinni. Þetta virkaði alla vega eins og heill plötuskápur þegar öll tilfinning hafði yfirgefið báða fætur og sjónin var farin að daprast. Annars ekki undan neinu að kvarta. Nema þá kannski fylleríinu á liðinu. Hvað er það að fara á tónleika á mánudegi og liggja svo slefandi og prumpandi úti við vegg? Eða hanga bara á "barnum" og tala rosalega hátt á meðan Roger Waters er á sviðinu? Veeeei.

Annars allt fínt bara, fullt af spennandi hlutum að gerast á X-FM eins og venjulega og dimmur verður sá dagur þegar tónlist hættir að koma manni á óvart. Helstu meðmælin þessa dagana eru...Eberg, Einar Tönsberg, sem var að gefa út Vaff Vaff, og Bela, sem er norðanpilturinn Baldvin Ringsted. Platan hans heitir Hole and Corner. Alveg ljómandi skemmtilegt.

Loksins glitti í sól og þá er ekki að sökum að spyrja. Við vbv brugðum okkur út í góða veðrið og slógum nokkra golfbolta. Ef eigandi brúna Saabsins sem stóð fyrir utan Skjá 1 á miðvikudaginn les þetta...þá var það vbv sem sló kúluna í húddið á honum.

Getur einhver, sem hefur hæfilega mikil völd og áhrif, bannað sýningar sjónvarpsauglýsingarinnar frá OR? Hún kallar fram líkamleg viðbrögð.

Það hafðist loksins!

2006-06-02T12:53:00.000Z

Ég er ansi lengi búinn að ætla að sjá Dúndurfréttir leika tímamótatónlist á sviði. Það hefur alltaf klikkað. Af ýmsum ástæðum. Það tókst hins vegar loksins á miðvikudaginn. Biðin var vel þess virði. Þetta er hugsanlega skemmtilegasta hljómsveit í heimi. Það veit á gott að hafa Dalvíking fremstan á sviðinu!

Það er mjög auðvelt að klúðra þessari yndislegu tónlist, höfundarnir hafa m.a.s. sumir gert heiðarlegar tilraunir til þess sjálfir, en Dúndurfréttir rúlla þessu upp. Stemmningin var líka afslöppuð og þægileg, lagalistinn greinilega ekki fyrirfram ákveðinn þannig að skemmtunin varð eiginlega bara enn meiri. Virðing mín fyrir hljómsveitinni fór stighækkandi með hverju lagi og náði eiginlega hámarki þegar þeir tóku Dogs með Pink Floyd, 17 mínútna lag af Animals-plötunni með flóknum kaflaskiptum og sólóum og öllum pakkanum. Ef þið hafið ekki séð Dúndurfréttir á sviði ennþá mæli ég með því að þið vinnið bragabót þar á.

Í vikunni bárust þau gleðitíðindi að hin sögufræga dans- og dægurlagahljómsveit Stuðkompaníið yrði endurvakin við hátíðlega athöfn. Stuðkompaníið var og er ein dásamlegasta hljómsveit Íslandssögunnar og er líklega eina hljómsveit þeirrar sömu sögu sem skartar tvennum bræðrum. Ef ég skil þetta rétt mun Stuðkompaníið, sem í árdaga hét Steðjabandið, troða upp einu sinni...og aðeins einu sinni...í Sjallanum 16.júní. Þar með er þarnæsta norðurferð komin algjörlega á hreint.

Hér á þessum yndislega vinnustað er ein varhugaverðasta lyfta landsins. Þá sjaldan hún er í lagi virðist hún frekar vera upptekin af því að framleiða furðuhljóð og leggja niður störf heldur en að flytja fólk og aðra hluti á milli hæða. Ég þurfti að nota lyftuna í dag og ákvað að þetta yrði síðasta lyftuferðin mín í bili...í þessu húsi a.m.k. Mér varð nefnilega litið á miðann í lyftunni, þar sem m.a. síðasta skoðun er skráð af mikilli natni...

Nú jæja.

2006-05-30T23:35:00.000Z

Það væru ýkjur að segja að maður hafi vaknað hissa á sunnudagsmorguninn. Þetta fór meira og minna eins og við var að búast. Græna vinstrisveiflan kom kannski aðeins á óvart. Yfirlýsingar Eyþórs Arnalds komu örlítið meira á óvart. Hann ætlar að vera oddviti sjallanna eftir allt saman...vegna þess að úrslit kosninganna gefa mjög ákveðna vísbendingu um það að Árborgarar telja glasalyftingar hans og staurastrokur minni háttar. Það sem kemur mest á óvart er að Framsókn, sem skeit á sig, er að smella sér inn í borgarstjórn og bæjarstjórnir hér og þar. Þarf ekki að fara að gera eitthvað í þessu?

Kíkti í kristalspartýið á laugardaginn. Gestalistinn hafði verið birtur opinberlega, hluti hans a.m.k., en þegar til kom mættu fæstir þeirra sem voru á þessum lista. Þetta var afar undarleg samkoma, svo ekki sé meira sagt. Hugmyndin er alls ekki galin, en framkvæmdin gekk ekki alveg upp. Plúsinn var sá að maður kynntist slatta af nýju fólki. Við félagarnir fundum upp nýjan samkvæmisleik, "finndu ríkasta aðilann í herberginu". Sigurjón Sighvats vann allar umferðirnar.

Var að koma úr ónefndu kvikmyndahúsi sem stendur í grennd við kirkju sem er eins og indíánatjald. Horfði á Poseidon. Hún er alveg svakaleg á köflum. Vel gerð og kosturinn er sá að "formálinn" er ekkert alltof langur. Stundum gerist ekkert í þessum myndum fyrr en rétt áður en maður fer heim, en þessi byrjar bara með látum. Ég stífnaði upp nokkrum sinnum af spennu. Held ég gefi henni bara hin ágætustu meðmæli. Er annars ekkert sérlega hrifinn af svona slysamyndum.

Ekki gleyma Reykjavík Tropik. Stefnir í algjörlega frábæra helgi. Þriggja daga tónlistarhátíð í tjaldi á lóð HÍ. Allar helstu sveitir landsins og erlendir gestir með Supergrass í broddi fylkingar!

Hér eru nánari upplýsingar...þetta er sko tengill...og allt.

Jæks!

2006-05-24T12:04:00.000Z

Ég vissi svo sem ekki við hverju var að búast, en engu að síður kom Ian Anderson þægilega á óvart. Aldrei þessu vant var hávaðinn á íslenskum tónleikum ekki algjörlega að æra mann; reyndar hefðu trommurnar mátt vera aðeins hærri í hljóðblöndun, en það kom svo sem ekki að sök þegar allt kemur til alls.

Anderson er svakalega flinkur músikant, ég var eiginlega ekki búinn að gera mér grein fyrir því hvað hann er góður gítarleikari, og flautuævintýrin voru á köflum svakaleg. Það virtist liggja ágætlega á honum, hann fór með gamanmál á milli laga og var bara ansi hnyttinn á löngum köflum. Hljómsveitin var pottþétt, fyrir utan þessa föstu meðreiðarsveina þar sem ungur þýskur gítarleikari vakti óskipta athygli voru með í för félagar í Sinfóníuhljómsveit Íslands undir forystu Roland Hartwell (Cynic Guru). Fiðluundrið var svo kapituli út af fyrir sig. Fyrir utan það að vera að afskaplega mikið augnakonfekt getur stúlkan spilað fyrir allan peninginn og á köflum gleymdi maður því hreinlega að Ian Anderson og Jethro Tull væru í aðalhlutverki. Kvöldið bauð upp á fjórar...hugsanlega fimm...gæsahúðir. Living In The Past, Mother Goose, Thick As A Brick og hrikalega flott útsetning Aqualung. Sko, hrikalega flott. Að ógleymdri einni ógleymanlegustu stund kvöldsins. Anderson gaf Luciu Micarelli sviðið, sagði hana ætla að spila eitthvað framandlegt og undarlegt eftir hljómsveit sem hann mundi ekki alveg hver var. Micarelli tók við, byrjaði á sæmilega löngum torskildum forleik og datt svo í Kashmir af fullum krafti. Gæsahúð kvöldsins.
Ég vorkenni þeim sem misstu af tónleikunum. Vorkenni ekki þeim sem slepptu því að mæta. Það er ekki hægt að kenna í brjósti um þá sem beita ekki hyggjuvitinu.

Framundan eru m.a. Reykjavík Tropik, hrikalega flott útihátið á lóð HÍ. Allar helstu sveitir landsins og svo auðvitað Supergrass. Zappa Plays Zappa 9.júní. Er einhver að fatta í hvers konar tónlistar- og tónleikaparadís við búum?

Æ...

2006-05-22T17:52:00.000Z

...ég gleymdi að skrá mig úr stjórnmálaflokkunum tveimur. Er reyndar að spá í að halda mig við aðra skráninguna. Eða ekki. Veit það ekki alveg. Fullt af sniðugum hugmyndum í gangi hjá bæjarstjóranum mínum og hans fólki, t.d. fríar nettengingar inn á öll heimili í Hafnarfirði! Þarf maður að velta þessu eitthvað sérstaklega fyrir sér?
Auglýsingar stjórnmálaflokkana eru nú annars ansi hreint skemmtilegar. Eða þannig. Björn Ingi og Gunnar Birgis keppa um titilinn "vafasamasti auglýsandinn". Aðrar auglýsingar standa afrekum þeirra félaga ekki svo langt að baki, hugmyndakreppan virðist algjör. Er svona rosalega mikið mál að búa til boðlegar auglýsingar? Þeir hjá Landsbankanum virðast ágætlega settir, Landsbankadeildarauglýsingarnar eru alveg ljómandi fínar.

Sá Silfrið að mestu í gær. Alveg merkilegur fjandi hvernig hægt er að halda úti svona þætti með sömu gestunum viku eftir viku. Eru þetta virkilega einu Íslendingarnir sem hafa eitthvað til málanna að leggja?
NFS var að detta inn á afruglarann minn fína. Ég er eiginlega þeirra skoðunar að ég hafi ekki misst af neitt rosalega miklu. Öðru en endalausum dagskrárstiklum Stöðvar 2. Fatta þeir ekki að svona ofofofkeyrsla hefur þveröfug áhrif á hinn almenna Íslending?

Ég er að upplifa áður óþekktan þrýsting fólks með staðfastar skoðanir. Menn og konur af öllum stærðum og gerðum eru að halda því fram að myspace sé málið og að það séu bara afdankaðir afturkreistingar sem blogga upp á gamla móðinn. Ég er ekki alveg að kveikja á þessu fyrirbæri. Kannski gerist það á allra næstu dögum. Þá verður flutt...eina ferðina enn.

Afmælisbarn dagsins...Steven Patrick Morrissey.

Þessi mikli andans maður er fæddur 22.maí í hinni frómu Manchester-borg og ekki orð um það meir. Maðurinn er snillingur.

Ég ætla ekkert að tjá mig um Júróvision, Lordi og Sylvíu Nótt...nema...að lýsa yfir ánægju minni með óendanlegar skilgreiningar helgarblaðanna, einkum hins háæruverðuga Morgunblaðs, á drjúpandi snilld íslenska keppandans. Hverri heilsíðunni á fætur annarri var eytt í það að dásama grínið, skilgreina það frá hinum ýmsu sjónarhornum og leiða sauðsvartan algmúgann í sannleikann um það að allt væri þetta útpælt og gríðarlega vel heppnað. Þetta er bara ekki svona rosalega útpælt. Ekki miðað við það sem ég hef séð af vinnsluferlinu. Þetta er eiginlega voðalega lítið pælt þegar allt kemur til alls. Stundum dettur fólk bara niður á eitthvað sem skilgreina má sem ódauðlega snilld...en á það ekki við um ansi margt ef viljinn er fyrir hendi?

Eitt enn. Ég var að setja upp danska útgáfu heimasíðunnar sem ég bjó til fyrir fyrirtækið hans pabba, les.is. Skora á ykkur að skoða síðuna, ekki síst ef þið þekkið aðila sem á við lesblindu að stríða...www.les.is. Þarna opnast nýir heimar. Ég er ekki að grínast.

PS. Matti biður að heilsa.

Ég er skráður til leiks!

2006-05-19T17:49:00.000Z

Ég er að komast að því, mér til mikillar hrellingar, að ég er skráður félagi í tveimur stjórnmálaflokkum. Ég hélt reyndar að það væri ekki hægt, bannað að viðlagðri opinberri hýðingu, en líklega eru skrokkaveiðarnar að taka á sig nýja mynd. Ég vissi reyndar af þessum skráningum á sínum og skráði mig til leiks af fúsum og frjálsum vilja, algjörlega og eingöngu í þeim tilgangi að "hjálpa" góðum mönnum í prófkjöri. Mér var hins vegar sagt að ég yrði afskráður jafnharðan. Það hefur s.s. ekki gerst og nú er ég að fá alls kyns póst og hressandi og upplífgandi símtöl frá fulltrúum tveggja stjórnmálaflokka. Fari þeir í fúlan pytt. Ég ætla að segja mig úr báðum flokkum eftir helgi. Ég vil fá Jón Baldvin í hringiðuna aftur.
Flottasta atkvæðatrikkið hlýtur að teljast það sem stuðningsmenn Bill Clinton notuðu í aðdraganda forsetakosninganna ´97...held ég frekar en ´93. Heill her manna og kvenna fékk það vandasama verk að hringja í kjósendur af handahófi og sannfæra hina vantrúuðu um ágæti frambjóðandans og ef hringjandinn lenti á talhólfi eða símsvara spilaði hann stutt ávarp Clintons af bandi. Þetta kom út eins og forsetakvikindið væri að hringja í eigin persónu!

Var að fá nýju Tool-plötuna í fangið og önnur hlustun stendur yfir. Það stefnir í að hún sanki að sér stjörnum. Tool er engin venjuleg rokksveit. Útpæld og flókin, hljóðfæraleikurinn algjörlega ótrúlegur á köflum.

Maynard James Keenan, forsprakki sveitarinnar, er mikill snillingur og mikill Kiss-aðdáandi, sem ber vott um afburða greind. Hann söng m.a. Calling Dr.Love á Kiss My Ass, plötunni sem var gerð til heiðurs tímamótasveitinni fyrir fáeinum árum.
10.000 Days með Tool er fyrir hugsandi rokkara. Titillinn er reyndar alveg hrikalega flottur, svona þegar maður kveikir á perunni. 10.000 dagar eru nefnilega rúm 27 ár...sem er aldurinn sem nokkrir athyglisverðustu tónlistarmenn síðari tíma náðu - Jim Morrison, Janis Joplin, Jimi Hendrix, Kurt Cobain.

Ian Anderson í Höllinni á þriðjudaginn! Spilar fullt af Jethro Tull, slagarana og allt. Hollara að missa ekki af þessum tónleikum.

Nenni ekki að tjá mig um Júróvisjon og Sylvíu Nótt. Ég bara nenni því ekki.

Jejeje!

2006-05-18T17:52:00.000Z

Ég er ekki að standa mig. Blogger var það ekki heldur um daginn. En þetta er satt best að segja bloggleti.
Síðustu dægrin hafa verið athyglisverð. Fyrsta ber að telja hestaferð með öllu tilheyrandi sem lagt var í til að fagna lokum leiktíðarinnar í enska boltanum. Til að gera langa sögu stutta var G.Ben í langflottasta gallanum...eiginlega sá eini sem var á pari...og Vala var keppandi kvöldsins. Hún datt af baki, meiddi sig lítið sem ekkert, og svo tók staðarhundurinn sig til og beit hana í síðuna. bnak átti tilþrif kvöldsins þegar hann svaraði í símann (!!!) og Böðvar stóð sig best í viðleitni til ástaratlota. Þetta var í fyrsta sinn sem ég hef skemmt mér ágætlega á hestbaki og ég er ekki frá því að ég hafi færst hænufeti nær því að skilja hvers vegna algjörlega heilbrigt fólk missir ráð og rænu í kringum þessar skepnur.
Svo er það kóngsins Köbenhavn. Árshátíð Skjás 1. Nýliðin helgi. Glimrandi skemmtilegt allt saman og hefði nú líklega sloppið til án árshátíðarinnar. Hún var stórskemmtileg, en þetta eru náttúrulega æskuslóðirnar og mér finnst ég alltaf vera kominn heim þegar ég kem til Köben. Mikið labbað. Mikið hlegið. Margt sem ekki er hægt að greina frá opinberlega.

Tók þessa einu mynd í allri ferðinni...í ónefndum litlum garði rétt hjá Strikinu þar sem við lágum nokkur og nutum lífsins á föstudaginn.

Ekki orð um það meir.

Ég hef hingað til verið nokkuð jákvæður í garð Sylvíu Nætur, ekki síst af því að mér finnst Ágústa Eva alveg ágæt, en þetta fer nú að verða gott. Júróvision-fráhverfa er farin að láta á sér kræla...ekki það að ég hafi verið mikill aðdáandi í gegnum tíðina, en það er eitthvað við þetta sem gengur ekki alveg upp. Ég er reyndar eitt þeirra foreldra sem lagði á sig ferðalag upp á Ártúnshöfða fyrir skemmstu til að gera yngra afkvæminu það mögulegt að berja goðið augum. Engin Sylvía Nótt. Engar skýringar. Fáránlegt.

Ég er svolítið hugfanginn af ungum og efnilegum íslenskum hljómsveitum þessa dagana. Einkum og sér í lagi Mammút, Jakobínarínu og Hello Norbert. Það er einhver óútskýranlegur ferskleiki sem einkennir þessar sveitir, hæfilegur skammtur af kæruleysi og áhyggjuleysi yfir markaðslögmálunum. Hugarfarið er líka í hárrétt, ég hef kynnst því af eigin raun þegar þessir krakkar hafa kíkt í heimsókn.
Annars er ég í nettu nostalgíukasti líka...Jeff Buckley er að koma sterkur inn. Ég held að það sé hollt að rifja upp kynni við slíka meistara með reglulegu millibili.

Versta auglýsing allra tíma?

2006-05-05T14:36:00.000Z

Ég er kannski orðinn önugur, það verður þá bara að hafa það, en sjónvarpsauglýsingar eru farnar að fara í taugarnar á mér. Það virðist sem einhver æðstiprestur auglýsingamála á Íslandi hafi lagt línurnar varðandi sjónvarpsauglýsingar; að hafa þær eins heimskulegar og torskildar og frekast er unnt. Það virðist keppikefli að láta auglýsingarnar fjalla sem minnst um það verið er að auglýsa og helst eiga þær að hafa þau áhrif að mann langi nákvæmlega ekkert til að kaupa viðkomandi vöru. Sú versta, í seinni tíð a.m.k., er án efa Egils appelsín-auglýsingin þar sem stelpan ýtir á Egils-rofann, plastflöskurnar hrynja niður úr loftinu og hanga þar í spottum og mamman (geri ég ráð fyrir) kemur inn í herbergið með hosuna og sprautar appelsíni yfir allt. Mig langar einmitt svo mikið að einhver sprauti yfir mig appelsíni! Hvað gerist svo ef einhver rekur sig óvart í Egils-takkann? Fullt af appelsíni hangandi í loftinu, gamla að gera góða hluti með hosuna en enginn í appelsín-stuði? Hrrmmmffff.

Fór í nudd um daginn. Nudd, hnykkingar og nálastungur. Svakalega fínt og gott, hef af þessu ágæta reynslu og nú eru einhverjir fjandans verkir sem líklega má rekja til herðablaðsins að gera mig vitlausan. Ríkharður, sem m.a. er Doctor of Oriental Medicine, tók eftir því, eins og væntanlega fjölmargir aðrir, að ég er stundum með kippi í andlitinu. Það ber mest á þeim þegar ég er þreyttur, en þetta má rekja til þess að ég lamaðist í andlitinu fyrir 20 árum eða svo, fékk eitthvað sem heitir Bells Palsy. Þetta er taugalömun, sjöundi andlitstaugaendinn verður fyrir áreiti og leggur niður störf. Þetta ku einna helst henda vanfærar konur (sem ég er ekki og hef aldrei verið) og sykursjúka, en ég var ungur maður í hörkuformi og meinið kom því talsvert á óvart. Helmingurinn af andlitinu var stjórnlaus með öllu í tæpar tvær vikur, en líklega hefði ég getað sloppið betur. Ég var staddur í New York þegar þetta brast á og var dröslað inn á vafasamt sjúkrahús í hliðargötu, þar sem indverskur læknir sem hvorki vissi í þennan heim né annan setti grysju yfir augað á mér! Límbandið náði frá enni niður á höku! Augnlokið hættir nefnilega starfsemi líka og hann hafði mestar áhyggjur af því, án þess að hafa grænan grun um hvað væri að gerast. Ég fór á Broadway-sýningu um kvöldið, sá ekki rass í bala og vakti næstum því meiri athygli heldur en leikararnir á sviðinu. Hefði ég komist í hendur almennilegs læknis, eða einhvers sem vissi hvað um var að vera, hefði líklega farið betur, bæði hefði verið hægt að stytta lömunartímann sjálfan og koma í veg fyrir stóran hluta eftirkastanna. Eftirköstin eru nefnilega talsverð og aukast í samræmi við þreytu og svefnleysi. Ríkharður sagði mér hins vegar, mér til mikillar gleði, að líklega væri hægt að "endurstilla" þessar taugar sem eru búnar að vera úti á túni í 20 ár. Þær eru ekki dauðar, þær vita bara ekki alveg hvernig þær eiga að haga sér. Alveg magnað. Ég á mér þá von eftir allt saman.

Var að fá þennan grip í hendurnar...

Stadium Arcadium - Red Hot Chili Peppers. Þvílíkur gæðagripur! Ég er búinn að vera mishrifinn af því sem RHCP hafa gert eftir Blood Sugar Sex Magik, en nú er þetta smollið í gírinn aftur. Frábærar lagasmíðar, Kiedis syngur eins og engill, Flea hefur sjaldan eða aldrei verið betri, Frusciante sýnir snilli sína á gítarinn (algjört lykilatriði hjá sveitinni) og Smitharinn traustari en nokkru sinni. Goðsagnarpersónan Rick Rubin stjórnar upptökum og sannar það í eitt skipti fyrir öll að hann er einn sá allra flinkasti í bransanum.
Fullt hús stiga...þessi verður talin til tímamótaverka.

Iggy var góður.

2006-05-04T16:37:00.000Z

Náði því ekki alveg að vera frábær. Reyndar var hann sjálfur alveg frábær. Heildarpakkinn, þ.e.a.s. Iggy & The Stooges var góður. Það jafnast fátt á við það að heyra perlur eins og I Wanna Be Your Dog, 1969 og Nu Fun leika í höndum upphafsmannanna. Í síðasttalda laginu kom hópur tónleikagesta upp á svið til Iggy, að hans tilstuðlan, og úr varð ansi flott partý. Einn eða tveir þátttakenda hafa þó líklega vaknað með nettan móral í morgun.

Þessi mynd var einmitt tekin við þetta tækifæri. Myndgæðin umdeilanleg. Ég bara nennti ekki að fara að troða mér nær til að taka myndir. Það er nettur nörd í því. Nördarnir eru reyndar að fara að taka yfir, þannig að líklega hefði ég átt að láta mig hafa það.
Það sem mér fannst hins vegar vanta á þessa tónleika var t.d. Search and Destroy, eitt albesta lag sveitarinnar. Þeir spiluðu meira og minna öll lög sem þeir kunna í heiminum, en slepptu þessum gullmola. Lýsingin var líka svolítið skrítin. Að ósk söngvarans held ég.
Annars var bara dúndurgaman og Dr.Spock sveik ekki frekar en fyrri daginn. Þvílík hljómsveit!

Næsta gæsahúð er Manchester-hátíðin í Höllinni á laugardaginn. Þá verður gaman. Og Geiri Sæm á Kringlukránni alla helgina! VÓ!

Hr. Osterberg er mættur!

2006-05-03T17:15:00.000Z

Einn áhrifamesti tónlistarmaður samtímans er mættur klakann. James Osterberg Jr., öðru nafni Iggy Pop, var víst í fínu stuði þegar hann mætti til landsins í gær.

Maður veltir því stundum fyrir sér hversu mikilvæg nöfnin eru í tónlistinni, hvort t.d. James Osterberg hefði náð viðlíka árangri og Iggy Pop. Iggy-nafnið tók hann sér snemma á ferlinum, fyrsta hljómsveitin hans hét The Iguanas og þetta var einhvers konar skírskotun til þeirrar sveitar.
Væri David Jones t.d. jafn vinsæll og David Bowie, Arnold Dorsey að gera jafn góða hluti og Engelbert Humperdinck, Kenneth Reginald Dwight líklegur til sömu afreka og Elton John og Declan McManus í svipuðum málum og Elvis Costello. Að ógleymdum Chaim Klein Witz, Stanley Harvey Eisen, Paul Daniel Frehley og George Peter Criscuola!
En aftur að Iggy. Það kom dálítið á óvart að hann virðist ekkert eyða neitt sérlega miklum tíma með félögum sínum í The Stooges. Hann var ekki samferða þeim til landsins, er ekki mikið að væflast með þeim á hótelinu, fór ekki með þeim út að borða í gærkvöldi og er ekki einu sinni í sama búningsklefa og þeir á tónleikunum! Listinn yfir það sem Iggy & The Stooges óskuðu eftir á tónleikastað var ansi skondinn. Engir stælar, ekkert vesen, en hins vegar undarlegir hlutir eins og Bob Hope-eftirherma, eintak af bandarísku dagblaði sem inniheldur grein um feitt fólk og almennilegur bjór. Ekki sullið sem byrjar og B og endar á udweiser. Hljómsveitin bað um tvær risastórar pizzur eftir tónleikana...og þær þurfa að vera svo stórar að þeir lendi í vandræðum með að henda pizzakössunum í ruslið.
Þetta hljóta að verða ansi magnaðir tónleikar, sveitin er að leggja af stað í tónleikaferð þar sem þeir koma m.a. við í Ástralíu og Noregi og yfirleitt gefa þeir sér góðan tíma á hverjum stað.
Dr. Spock hitar upp. Ein flottasta hljómsveit landsins. Stendur á þröskuldi heimsfrægðar. Mér skilst að nýir búningar verði frumsýndir í kvöld.

PS. Takk fyrir allar hamingjuóskirnar. Trausti frændi er toppmaður.

Engar hamingjuóskir?

2006-05-01T15:33:00.000Z

Ákveðin vonbrigði. Þetta var stór og mikilvægur sigur. Ég reikna líka með að það verði óskaplega gaman í Manchester. Ingu Rún fannst þetta stórmerkilegt, en henni fannst gamli maðurinn eiginlega ekki svara neinu. Ég var samt með þetta allt saman. Sara Líf skilur ekkert í því að ég skuli ekki gefa henni Manchester-miðana. Hún skilur reyndar ekki heldur af hverju ég vil ekki gefa henni Sony Ericsson-símann, þannig að þetta kemur kannski ekkert mjög á óvart.

Upplifði undarlegan hlut í dag. Haglél í sólskini. Ég er ekkert sérlega veðurfróður maður og nenni sjaldnast að spá í veðrið, en þetta kom samt á óvart og var undarlegt í meira lagi. Glampandi sól og svo allt í einu duttu kögglarnir í hausinn á manni. Sólin hörfaði og við tók rigning. Ég var sem betur nýbúinn að þrífa bílana, þannig að tímasetningin var ágæt.

Annars er þessi til sölu...

Hin ágætasta bifreið af gerðinni Mercedes Benz 230E, anno 1991. Mamma og pabbi keyptu þennan ágæta bíl fyrir ekki svo löngu, en þurfa svo ekki á honum að halda. Fínt eintak, hefur dvalið mikið erlendis og meðferðin hefur greinilega verið til fyrirmyndar. Góðar græjur og hvaðeina. Ef ég ætti ekki frábæran Skoda myndi ég kaupa þennan sjálfur.
Ég skal fúslega veita áhugasömum frekari upplýsingar.

Sejren er vor!

2006-04-30T22:57:00.000Z

Þetta fór nú bara á allt annan veg en ég átti von á. Ég var búinn að búa mig undir það að tapa ansi hressilega fyrir tónspekingunum úr Efstaleitinu í Popppunkti, en við gerðum okkur lítið fyrir og unnum nokkuð sannfærandi sigur. Þar með hljótum við að teljast stöðin sem á tónfróðustu dagskrárgerðarmennina. Þar til annað kemur í ljós. Það er nú ekkert smotterí!

Flutningur okkar á Relax, þar sem Doddi fór hamförum og spænsk áhrif gítar/bassaleiksins voru nokkuð áberandi, eru meðal hápunkta kvöldsins. Smiths-meinlokan er með lágpunktunum. Það er alveg með ólíkindum að fá svona heilafrost varðandi eina hljómsveit. Ég mundi bara ekkert um Smiths, en samt er þetta líklega sú Manchester-sveit sem ég veit mest um. Þannig. Kom sem betur fer ekki að sök. Efstleitingar tóku ósigrinum af myndarskap, enda annað ekki hægt. Stigaskorið var reyndar óvenjulega hátt, 42-38, og sigurinn var ekki tryggður fyrr en í lokaspurningu andstæðinganna í valflokkunum. Ég held að við höfum náð að snúa þessu okkur í vil þegar við stálum Ian Brown í popphjólinu.
Það er auðvitað magnað að hafa fengið flugmiða fyrir tvo til Manchester, sem hefur haft þau afdrifaríku áhrif á líf mitt að ólíklegasta fólk er farið að vingast við mig, en það er samt sætara að hafa lagt þessa miklu poppfræðinga að velli.
Ég er sáttur.

Hér er Andrea vinkona mín að búa sig undir herlegheitin...og Doddi og Matti alveg klárir í slaginn. Það örlar fyrir hreyfingu á myndinni...vegna þess að myndatökumaðurinn var ekki alveg jafn tilbúinn.

Nú er það punkturinn.

2006-04-30T18:12:00.000Z

Popppunktur. Sérstakur Manchester-þáttur á dagskránni í kvöld, þar sem X-FM keppir við Rás 2. Hin fagra fylking er skipuð yðar einlægum, Matta og Dodda litla. Doddi er strangt til tekið ekki að vinna á X-FM, en pilturinn er skarpgreindur og vel að sér í Manchester-fræðum. Þess vegna var hann valinn í keppnisliðið. Mér skilst að Rásarhópurinn sé skipaður Óla Palla, Andreu Jóns og Freysa, sem aðeins einu sinni hefur tapað í Popppunkti. Óli Palli hefur keppt áður, mig minnir að þar hafi atvinnumennirnir mætt áhugamönnunum, en ég man ekki fyrir mitt litla líf hvernig það fór. Við erum að spá í að láta fegurðina ráða ferðinni og svara öllu sem við ekki vitum "x-fm". Segja t.d. "x-fm" í staðinn fyrir "pass". Þetta er nokkurs konar áreitisherferð, sem á að skila því að eftir að hafa horft á þáttinn munu áhorfendur hlusta á X-FM sem aldrei fyrr.

Ég var á röltinu með Tuma fyrir fáeinum dögum og komst að því að ég heimsæki miðbæ Hafnarfjarðar alltof sjaldan. Síðan ég kom þangað síðast er búið að byggja eitt risastórt hús, rífa annað og það þriðja er um það bil að rísa. Miðbærinn er að verða ansi álitlegur.
Ég rakst líka á eina frægustu hljómsveitarrútu landsins.

Hún stendur alein og yfirgefin á milli húsa í Strandgötunni, við hliðina á gamla Landsbankanum sem mig minnir að sé orðin einhvers konar veiðiverslun. Gæti þó verið bókabúð. Veiðiverslun og bókabúð eiga hættulega fátt sameiginlegt, en það er önnur saga.
Þessi ágæta rúta hefur líklega rúllað fleiri hljómsveitarferðir um þjóðvegi landsins en nokkur önnur sjálfrennireið í sögu lýðveldsins, en hún má svo sannarlega muna sinn fífil fegurri. Ég held að Hljómsveit Íslands, sem m.a. fylgst var með á Skjá 1 á sínum tíma, sé síðasta sveitin sem nýtti sér reynslu hennar, en ferðirnar voru orðnar lengri og tímafrekari en til stóð vegna tíðra bilana. Það væri athyglisvert ef hægt væri að skrapa söguna af innréttingum rútunnar, þá kæmi líklega eitt og annað áhugavert í ljós.

Af hverju heitir brauðrist ristavél hér sunnan heiða?

Það er ekki...

2006-04-29T14:56:00.000Z

...gaman að lýsa fótboltaleikjum sem klárast eftir fjögurra mínútna leik. Klárast í þeim skilningi að sterkara liðið skorar eftir fjórar mínútur og þar með er dagskránni lokið. Hálfleikur hjá Liverpool og Aston Villa. Ekkert að gerast fyrir utan markið hjá Morientes.
Chelsea tryggði sér titilinn með því að skeina United á Brúnni. Þannig er það bara. Rooney meiddist og er tæpur fyrir HM. Fréttin af Rooney á fotbolti.net er rakin snilld. Ég held að það sé ekki ein setning þarna sem vit er í.

Enski landsliðsmaðurinn Wayne Rooney var borinn af leikvelli í börum þegar Manchester United tapaði gegn Chelsea í dag þegar aðeins sex vikur uppá dag er í fyrsta leik englendinga á heimsmeistaramótinu.Búist er við því að Rooney, sem er 20 ára gamall, muni vera aðaltromp englendinga á heimsmeistaramótinu í sumar meiddist og var í miklum þjáningum eftir tæklingu frá Portúgalanum Paulo Ferreira í dag. Rooney meiddist á sömu löpp þegar England datt út úr fjórðungsúrslitunum á Evrópumótinu 2004 og meiðsli hann voru sögð hafa mikil áhrif á möguleikum Englands á sigri.

Maður þarf virkilega að leggja sig fram við lestur svona tímamótaverka.

Ég veit...ég veit!

2006-04-28T16:50:00.000Z

Ég er moldruglaður. Umskiptin voru mér einfaldlega um of. Ég er kominn heim aftur. Þetta er ekki valkvíði, ég komst bara að því að gallarnir við hitt heimilið voru fleiri en kostirnir. Tók þess vegna blogspottinn og lagaði hann aðeins til. Henti m.a. Haloscan-krappinu út.

Ég verð að vera í þeirri aðstöðu að koma svona löguðu á framfæri...

Þetta blasti við á ónefndu hringtorgi í ónefndu bæjarfélagi í morgun. Malarflutningabíll á hliðinni. Í hringtorgi!

Fyrirtæki dagsins er Hekla. Næst þegar þið kaupið bíl skuluð þið fara þangað. Það er jafnvel spurning um að drífa bara í því strax að kaupa bíl hjá Heklu. Jafnvel þótt engin slík áform hafi verið uppi.
Skódinn fór í tékk um daginn og það kom í ljós að það þurfti að skipta um allt sem viðkemur bremsunum og einhverjar hosur og membrur og webera...og ég þurfti ekki að borga krónu með gati. Þar sem tiltölulega stutt er síðan ég keypti bílinn tóku þeir allan kostnaðinn á sig. Tugi þúsunda króna. Algjörlega frábært.
Ég er líka voðalega feginn að vera kominn á Skódann aftur. Ég skontraðist um á Lancernum hennar mömmu í nokkra daga. Þetta er svo sem ágætur bíll, en ég skil ekki þá ákvörðun japanskra verkfræðinga að setja í bifreiðina vél sem skilar álíka miklu af sér og sunnangola á fögru sumarkvöldi. Ég hélt stundum, þar sem ég var að taka af stað á ljósum, að ég væri kominn í samhliða tilveru þar sem tíminn stendur í stað. Um leið og reiðhjólafólkið þaut framúr mér áttaði ég á mig á því að ég var enn í þessum heimi.
Talandi um bíla og umferð má kannski minnast á niðurstöður viðamikillar vísindarannsóknar á hegðun ökumanna í umferðinni sem snorrinn hefur staðið fyrir síðustu daga. Þetta er eiginlega meinfyndið og getur reynst hið besta skemmtiatriði þegar umferðin er mikil. Næst þegar þið eruð stopp á rauðum ljósum prófiði þá að láta bílinn renna áfram um svo sem eins og einn sentimetra. Bílarnir á eftir ykkur gera slíkt hið sama! Alveg um leið. Það má m.a.s. endurtaka þetta nokkrum sinnum á sama stað, en hafa verður í huga að rýmið er ekki óendanlegt og ef óvarlega er farið endar yðar bifreið á næstu bifreið fyrir framan...eða úti á miðri götu. En þetta hefur ekki klikkað ennþá...láta renna örstuttan spöl og fylgjast svo með í baksýnisspeglinum. Þetta gæti verið dund helgarinnar!

Dammit.

2006-04-26T19:49:00.000Z

Kommentakerfið í rúst. Fluttur aftur á snorris.bloggar.is. Hana nú.

Mikið rosalega...

2006-04-24T19:07:00.000Z

þarf stundum lítið til að gleðja mann. Ég er því t.d. alveg ofsalega feginn að Spaugstofan skuli vera komin í sumarfrí. Líklega væri það vel til fundið að hafa þetta lengsta sumarfrí mannskynssögunnar. Það sem pirrar mig, fyrir utan lamaða brandara og illa unnin atriði sem oftar en ekki virðast fæðast af nauðsyn frekar en listrænni þörf (!), er að ég veit að þessir ágætu leikarar fá vel borgað fyrir þetta. Það er eiginlega það fyndnasta við Spaugstofuna.

Ég rakst á þennan bíl í Hafnarfirði í dag. Fann mig knúinn til festa hann á filmu. Eða tölvukubb. Bíllinn rifjaði nefnilega upp löngu horfna tíma og það helltust yfir mig minningar skemmtilegra stunda á bílasýningum Bílaklúbbs Akureyrar við Oddeyrarskóla á 17.júní. Þetta er ekkert merkilegur bíll, Hyundai Whatchamacallit, en dekkin eru safngripir. Það var nefnilega þannig fyrir nokkrum árum, a.m.k. fyrir norðan, að það var enginn maður með mönnum nema hann væri með hvíta hringi á dekkjunum. Þetta var ógurlegt mál, því ef dekkin komu hringjalaus frá framleiðanda var hægt að kaupa hringi sem settir voru á á næsta dekkjaverkstæði. Það gerðu nánast allir. Á tímabili fannst mér hvíthringjalausir bílar hreinlega ljótir. Mér fannst ostur reyndar líka vondur, borðaði helst ekkert grænmeti og taldi franskbrauð og djús herramannsmáltíð. En þetta hefur sem betur fer allt breyst.

Horfði á Goal á dögunum. Myndin fékk talsverða umfjöllun á sínum tíma og slarkfæra dóma hér og þar. Samviska mín leyfir mér ekki að mæla með henni. Þetta er eiginlega bölvað drasl. Það segir sína sögu að David Beckham, af öllum mönnum, leikur lítið hlutverk í henni.
Keypti hins vegar báðar Kill Bill-myndirnar á fáránlegu tilboði úti í sjoppu. Þúsundkall er ekki mikill peningur fyrir þessar perlur. Næsta mál á dagskrá er að eignast restina af Tarantino. Og Godfather-myndirnar.

Mestu og bestu meðmæli vikunnar fær Morrissey. Nýja platan hans, Ringleader Of The Tormentors, er algjörlega frábær. Höddi Magg orðaði þetta þannig að til þess að toppa þessa plötu þyrfti að endurlífga Wilson-bræður og gera nýja Beach Boys-plötu. Það eru bestu meðmæli í heimi. Það kom mér svolítið á óvart hvað meistarinn nýtur mikilla vinsælda hérna heima. Ég hef sjaldan eða aldrei fengið önnur eins viðbrögð við plötu vikunnar á X-FM.

Hættur við!

2006-04-22T18:09:00.000Z

Að flytja. Allavega í bili. Hreinlega verð að geta birt myndir. Bloggar.is er ekki alveg að dansa hvað það varðar.
Ég er að verða eins og vbv...flyt bara eins og ég fái borgað fyrir það. Hann má að vísu eiga það að hann er ekki flytja fram og tilbaka á milli sömu íbúða. Hann er að vísu kominn í fjórðu íbúðina við sömu götu!

Afastrákurinn minn er í heimsókn í Bröttukinn. Glói Tumason fær að gista hjá föður sínum fyrst hann er í bænum. Býr annars norður á Akureyri. Hann er orðinn glettilega líkur föður sínum. Örlítið hávaxnari og grennri. Tumi er kraftalegri, en samt fimari. Lundarfarið er svipað. Þetta eru átakanlega skapgóðir hundar.

Það læðist að mér sá grunur að mamma og pabbi verði orðin ansi framlág á morgun.

Annars er ég eiginlega búinn að taka stórar ákvarðanir, sem vonandi hafa mannbætandi áhrif. Líklega er best að blaðra sem minnst um aðra þeirra í bili, en hin snýr að blessaðri þjóðkirkjunni. Ég ætla að segja mig úr henni. Ætlaði reyndar að vera löngu búinn að því. Ég er ekki mjög trúaður maður og þoli ekki þessa þröngsýni varðandi réttarstöðu samkynhneigðra. Nýtt frumvarp er örlítið skref í rétta átt, en betur má ef duga skal. Það er löngu orðið tímabært að aðskilja ríki og kirkju.

Mourinho vinnur ekki fjórfalt eins og hann ætlaði sér. Hann verður að láta sér nægja að vinna einfalt í ár. Það gleður mig ekkert sérstaklega að Liverpool nái árangri, truflar mig ekkert heldur, en ég fagna því að heiðurspilturinn Hörður Magnússon hafi ástæðu til að kætast. Ég gleðst fyrir hans hönd. Og fyrir hönd Gústa frænda. Kannski einhverra fleiri.

Fréttakonan á NFS var að bjarga deginum. "...þar sem áin rennur til sjós."

Fluttur!

2006-04-21T20:31:00.000Z

Ég nenni ekki lengur að eiga við tiktúrurnar í þessum blessaða blogger. Ég er fluttur. Nýja heimilið er hér.

Góðar stundir.

Tíðindalítið.

2006-04-11T20:01:00.000Z

Þannig lagað.
Bloggerinn er búinn að vera til vandræða, sem er svo sem ekki fréttnæmt í sjálfu sér. Ég var að spá í að flytja mig yfir blog.is, en það er eitthvað við útlit síðunnar þar sem ég er ekki alveg nógu ánægður með.
Helsta afrek síðustu daga eru kvöldstundir með frægasta meðlimi ættarinnar, að okkur bræðrum meðtöldum.

Bjarni Tryggva, geimfari og fræðimaður, og Nína systir hans komu í stutta heimsókn á dögunum. Þau komu í mat til mömmu og pabba bæði á föstudag og sunnudag. Ég hef hitt Nínu nokkrum sinnum áður, en var að hitta Bjarna í fyrsta og annað sinn. Þetta er stórskemmtilegt fólk, sem hefur upplifað ýmislegt. Bjarni er auðvitað alveg glimrandi frægur og hefur afrekað meira en flest okkar geta látið sig dreyma um. Maður var nú kannski alveg að missa sig í einhverjum geimspurningum, en ég komst þó að því að geimfarar borða bara allt að því venjulegan mat á meðan á löngu og ströngu ferðalagi stendur. Ekki pillumat eða viðlíka, eins og ónefnt heilsuvörufyrirtæki hefur haldið fram. Það er svona líka glimrandi gaman að spjalla við hann. Þau bæði, ef út í það er farið.

Hér sitja systkinin í góðu tómi í Bröttukinninni.
Það var nú reyndar svolítið fyndið að í úrslitum söngkeppni framhaldsskólanna á laugardaginn var sungið til heiðurs Bjarna. Gott ef það var ekki bara MR sem setti Space Oddity úr smiðju meistara Bowie í íslenskan búning. Bjarni skildi nú ekki textann, en fannst þetta bráðfyndið.

Það var ekkert átakanlega sorglegt að horfa á stórleikinn á Old Trafford á sunnudaginn með Arsenal-aðdáanda sér við hlið. Merkilegt hvað þessir Nallar hafa haft sig lítið í frammi síðustu daga. Nenni reyndar ekki að tala við þá um Juventus-leikina. Juventus er furðulegasta fótboltalið í heimi. Það vantar í það allt malt.

Nokkur meðmæli.
Nýja platan með The Flaming Lips. At War With the Mystics. Mikið eyrnakonfekt. Ég var líka að fá í hendurnar nýju Jet Black Joe-plötuna, Full Circle, sem kemur út undir lok mánaðarins. Fyrstu tvær hlustanir lofa góðu. Fullt af spennandi tónleikum framundan og alls ekki vitlaust að fara að skipuleggja sig svolítið. Svona fyrir utan stórstjörnurnar er við hæfi að minna á færeyska tónlistarveislu á Nasa 22.apríl. Nágrannar okkar eru að gera fína hluti í tónlistinni. Vel þess virði að gefa þessu gaum.

Svo er auðvitað málið að hlusta á X-FM 91.9. Alltaf.

Jæja!

2006-04-06T17:13:00.000Z

Nú eru hlutir að gerast. Það er búið að vera mikið að gera í kaupfélaginu.

Ég var að ráða mig í starf dagskrárstjóra X-FM. Kem til með að vinna samhliða Matta fram á haust, þá heldur hann til Bournemouth til náms og ég sit einn eftir. Þetta er ansi spennandi verkefni, stöðin er á stöðugri uppleið og vinnuumhverfið afar skemmtilegt. Það er eitt sem þetta útvarpsbatterí, Íslenska Útvarpsfélagið, hefur fram yfir flest systkini sín, sem ég þekki ágætlega af eigin raun og það er smæðin og nálægðin. Hér er engin vasahasar yfirbygging, boðleiðirnar stuttar og menn tilbúnir til að taka upp á ótrúlegustu hlutum. Og tónlistin maður...

Rockstar-gengið er búið að vera á landinu í nokkra daga og það var ansi hreint magnað að fylgjast aðeins með prufunum í gær. Hver stórsöngvarinn á fætur öðrum steig á stokk og 17 þeirra fengu annað tækifæri. Þeir voru að syngja í dag. Við vorum búnir að komast að nöfnum 7 þeirra og þeir eru allir nema einn í hópi kunnustu tónlistarmanna þjóðarinnar; Hreimur í Landi og sonum, Magni í Á móti sól, Jenni í Brain Police, Kristó í Lights On The Highway, Matti í Pöpunum og Dúndurfréttum og Pétur Jesús. Man ekki hver sá sjöundi var. Það hefur hvílt mikil leynd yfir framgangi mála í dag, en ég held að ég sé ekki rjúfa nein heit að fokka í einhverjum samningsferlum þótt ég hvetji þjóðina til að fylgjast með á komandi misserum.

Hér er Jenni að láta ljós sitt skína. Ef vel er gáð má sjá glitta í gítarleikarann góðkunna Búa Bendsten hægra megin við söngvarann síkáta.

Kíkti aðeins á tónleika Leaves á Gauknum á mánudaginn. Það gerist nú ekki á hverjum degi að þessi fróma sveit spili á landinu bláa, þannig að þetta var ansi kærkomið. Ágæt skemmtun.

Þess má geta að ljósmyndarinn er afar stoltur af samspili ljóss og skugga á myndinni.

Æi...

2006-03-30T15:49:00.000Z

...þessi þöglu mótmæli mín við tilviljanakenndum leiðindum í blogger eru ekki að skila neinum árangri. Þögul mótmæli mín virka yfirleitt ekki. Ég hef verið að mótmæla bæði birtingastælum í blogger og óheyrilega háu áskriftarverði Sýnar í tilefni HM í sumar. Hvorugt er að skila árangri.

Ég fór á tónleika í gærkvöldi. Sem er kannski ekkert fréttnæmt í sjálfu sér. Þetta voru hins vegar einhverjir skemmtilegustu og bestu tónleikar sem ég hef sótt í mörg herrans ár. Það voru sorglega fáir í salnum og ég dreg þá ályktun að þjóðin hafi ekki enn áttað sig á því hvað þessi hljómsveit er fáránlega góð. Cynic Guru var að fagna útgáfusamningum í Bretlandi og Japan. Roland Hartwell er einfaldlega snillingur. Hljómsveitin var algjörlega frábær. Roland og félagar fara til Bretlands 1.júní til tónleikahalds og ég er að vona, með almannaheill í huga, að þeir haldi a.m.k. tvenna tónleika til viðbótar áður en þeir halda af landi brott. Þeir eru nefnilega að spila á Gauknum í kvöld, fimmtudagskvöld. Gigg sem var ákveðið með afar stuttum fyrirvara. Ef þið viljið eignast góða plötu sem veitir gleði og ánægju skuluð þið bruna út í næstu plötubúð og festa kaup á Iceland með Cynic Guru. Ég ábyrgist ómælda gleði og ánægju.
Mér datt reyndar í hug, svona rétt í þann mund sem ég skrifaði orðið "bruna" einhver rosalegasta prentvilla sem leitað hefur í fjölmiðla. Óheppinn fjölmiðlungur setti óvart eitt lítið "d" inn í orðið. Í næstaftasta bil.

Þessa tók ég sjálfur. Á myndavélasímann góða.

Þessar tvær fékk ég hins vegar lánaðar.

Algjörlega frábært.

Það er hugsanlegt að þessi mynd af Cynic Guru verði sú síðasta sem tekin er á Sony Ericsson K-750 símann góða og birt á þessum vettvangi. Ég var að eignast Nokia 3250. Mér sýnist þetta vera rosalegasti gsm-sími í heimi. Af honum verða færðar fréttir á komandi dögum og vikum. Kvikindið lítur svona út: http://www.gsmarena.com/nokia_3250-1296.php

Eftir 8 mánaða hlé.

2006-03-13T23:50:00.000Z

Svona líta menn út þegar þeir hafa útilokað allar hugsanlegar afsakanir, þ.m.t. hnémein, og látið sig hafa það að mæta í ræktina eftir átta mánaða hlé. Fyrsta æfing var kannski í lengri kantinum og fullmikið tekið á því. Myndin er óskyr vegna skjálfta viðfangsefnisins.

Sem betur fer líta dæturnar öllu betur út. Þær eru líka í betra formi.

Það er svo margt skrítið...

2006-03-13T16:23:00.001Z

...að gerast á Íslandi. Atgangurinn í Jónínu Ben, ráðherraskiptin, nýr landsliðsþjálfari í handbolta, blaðaopna um væntanlega árshátíð ónefnds fyrirtækis og hverjir mæta líklega og/eða hugsanlega, þingmenn lamdir og barðir á hinu háa Alþingi og svo mætti lengi telja.

Öll sú samúð sem ég kann að hafa haft í garð Jónínu Ben er fokin út í veður og vind. Þetta er nú eiginlega einum of langt gengið. Á einhverjum tímapunkti kann hún að hafa verið í ágætum málum, svona gagnvart almenningi í það minnsta, en þetta er bara ljótt og illa gert. Reyndar var fréttaflutningurinn af undanfara þessa málefna.com-máls og þess alls vafasamur í meira lagi, fréttastofa NFS fór algjörlega yfir strikið. Orðalag fréttanna af málinu var fáránlegt, dylgjur og hálfkveðnar vísur í æsifréttastíl. Fréttastofa RÚV fór betur með, einkum og sér í lagi í útvarpsfréttum. Rakst á athyglisverðan pistil eftir Ólaf Teit um þetta mál í Viðskiptablaðinu. Holl lesning. Fjölmiðlapisltar hans eru nánast undantekningalaust áhugaverðir.

Mæli með að þeir örfáu sem ekki enn hafa horft á nýja þáttinn á Skjá 1, 6 til sjö, veiti honum athygli. Þetta er dæmi um það hvernig á að búa til þægilegan, athyglisverðan og áhorfsvænan sjónvarpsþátt. Stjórnendurnir eru ekki helteknir af eigin ágæti og koma hlutunum átakalaust frá sér. Ekki alltaf sama fólkið að tala um sömu hlutina og húmorinn í hávegum hafður. Maður öðlast hreinlega trú á sjónvarpsmiðlinum á ný. Guðrún og Felix eru ekta íslenskar sjónvarpsstjörnur. Hvaða snillingur var það á Lynghálsinum sem lét sér detta það í hug að leyfa söngkonunni síkátu að yfirgefa samkvæmið? Reyndar...á þessum nótum...verður að hrósa Helga Seljan fyrir vasklega framgöngu í Íslandi í dag. Það með er hróshorninu lokað. Í bili.

Hér er létt getraun í tilefni mánudags. Hver er þessi bráðmyndarlegi vindlareykingamaður? Hann er reyndar þekktur fyrir flest annað en vindlareykingar og myndin er því nokkurs konar safngripur, gæti verið einhvers virði. Líklega verður konan hans ekki kát þegar hún sér myndina. Hvað veit ég?

Þegar allt kemur til alls...

2006-03-01T21:43:00.000Z

...er þetta fallegasta merki í heimi.

KA er stórmerkilegt og stórbrotið félag. Hjartað tekur kipp í sérhvert sinn sem ég sé hinn undurfagra gula og bláa búning. Ég skal reyndar viðurkenna það að fyrstu dagarnir eftir að mér varð ljóst að ég yrði KA-maður þar til yfir lýkur, strax eftir heimkomuna frá Danmörku árið 1977, voru svolítið erfiðir. Ég hef nefnilega frá blautu barnsbeini - og auðvitað að hluta til vegna uppeldis í Danaveldi - haldið með Dönum í flestum ef ekki öllum íþróttagreinum. Nema náttúrulega þegar þeir spila gegn Íslandi. Þess vegna átti ég svolítið erfitt með að sætta mig við það að félagið sem stendur hjarta mínu næst skuli spila í búningum erkióvinanna í norðri...bévitans Svíanna. Fyrsti KA-leikurinn sem ég sá var knattspyrnuleikur gegn fjendunum handan Glerár. Þór. Þeir spiluðu í varabúningi danska landsliðsins. Ég átti afskaplega bágt. Var reyndar að míga á mig úr hræðslu líka, því við borguðum okkur ekki inn. Skynsemin tók þó völdin og fyrir utan part úr degi þar sem Adda Unnars tókst næstum því að sannfæra mig um að liðið úr þorpinu væri stærra og merkilegra hef ég verið...og verð...KA-maður. Þar til yfir lýkur. Það er reyndar svolítið fyndið að það skuli hafa verið Addi Unnars sem var að rugla þetta, því þótt hann sé Þórsari liggja taugarnar til KA líka. Jonni Magg er nefnilega bróðir hans. Það hafði heldur engin áhrif á mig að æfa körfubolta með Þór. Það var eingöngu vegna þess að það er engin körfuknattleiksdeild í KA. Hún var þar fyrir margt löngu og hinir merku Tulinius-feðgar, sem lengi vel stóðu í fylkingarbrjósti Þórskörfunnar, eru í raun gegnheilir KA-menn.

Ég sannfærðist um það í eitt skipti fyrir öll í kvöld að römm er sú taug og þótt ég hafi einhverjar taugar til annars íþróttafélags verð ég aldrei annað en KA-maður. Svona innst inni. Kíkti aðeins á leik Hauka og KA í handboltanum. Þrátt fyrir sannfærandi tap var ég ákaflega stoltur. Þetta er nefnilega liðið mitt og hvernig sem gengur, hvort verið er að landa titlum eða berjast í bökkum, eru það forréttindi að eiga horn fyrir félagið sitt í sálartetrinu.
Það eina sem vantar er einhvers konar KA-félag á höfuðborgarsvæðinu. Það var til fyrir nokkrum árum og það getur vel verið að það sé til ennþá en passað sé sérstaklega vel upp á það að ég viti ekki af því! Við þurfum að sýna stuðning okkar í verki. Er einhver memm?

Tónlistarverðlaunahátíð X-FM tókst vel í alla staði. Eiginlega betur en nokkur þorði að vona. Við höfum líka fengið alveg glimrandi fín viðbrögð við þessu uppátæki. Ég náði reyndar ekki að upplifa hátíðina nema að hluta, þannig lagað. Eyddi kvöldinu að mestu baksviðs og tók þar viðtöl við verðlaunahafa um leið og þeir komu skeiðandi af sviðinu. Komst að því, sem mig hafði reyndar grunað, að Ragnar Kjartansson, sem m.a. þenur raddböndin með Trabant, er einhver skemmilegasti og athyglisverðasti maður landsins. Jákvæðari og opnari mann hef ég sjaldan hitt. Svo er hann auðvitað stórmerkilegur listamaður.
Þetta var skemmtilegt og verður vonandi til að auka hróður X-FM enn frekar. X-FM er nefnilega góð útvarpsstöð. Sendir út á tíðninni 91.9.

(Knattspyrnuáhuga)fólk er skrítið!

2006-02-22T17:26:00.000Z

Ég upplifði undarlegan hlut í gær. Hef svo sem upplifað hann áður, en einhverra hluta vegna tók ég meira eftir honum í gær en áður. Skrapp á Players til að horfa á Bayern München - Milan í Meistaradeildinni, bæði til að sjá skemmtilegan leik og ekki síður til að veita vbv einhvers konar andlegan stuðning. Honum veitti ekki af, þrátt fyrir ásættanlega frammistöðu rosso-neri. Staðurinn var fullur af Púllurum, sem kom í sjálfu sér ekki á óvart, en þessi vani þeirra (og væntanlega stuðningsmanna fleiri liða) að klappa fyrir sínum mönnum í tíma og ótíma er náttúrulega bara fyndinn! "Já...vel gert"...klapp klapp klapp. Á öldurhúsi í Kópavogi. Þeir sem verið er að klappa fyrir eru á knattspyrnuvelli í Portúgal! Ég þekki engan sem klappar fyrir fótboltamönnunum í sjónvarpinu heima hjá sér.

Á morgun verður lokað fyrir leikmannaskipti í NBA. Það eru uppi u.þ.b. 8.218 sögusagnir um takteringar hjá New York Knicks og nokkuð ljóst að á föstudaginn mætir liðið gerbreytt til leiks. Þessi umskipti hafa haft það mikil áhrif á mig að sl. nótt dreymdi mig að ég bæri ábyrgð á öllum leikmannaskiptum Knicks. Ég upplifði mikla pressu. Var reyndar óánægður með að Isiah Thomas var að reyna að næla í leikmann sem ég vil ekkert með hafa og það var því nokkur léttir að vakna og horfa framan í ískaldan raunveruleikann; ég hef ekkert með leikmannamál New York Knicks að gera. Því miður. Líklega væru Knicks betur staddir fengi ég einhverju ráðið.

Okkur vantar fleiri menn í þessum gæðaflokki. Morgundagurinn á eftir að reynast mér erfiður. Draumurinn er að fá Steve Francis í skiptum fyrir Jamal Crawford, Maurice Taylor og Trevor Ariza...jafnvel þótt Francis sé álíka gráðugur á boltann og Marbury og Jalen Rose til samans...og Theo Ratliff og Darius Miles í skiptum fyrir Penny Hardaway og valrétt í nýliðavalinu. Þá er þetta orðið þokkalegasta lið með bjarta framtíð í Eddy Curry, Channing Fry, David Lee og Nate Robinson.

Þessi draumur um að stýra leikmannamálum New York Knicks kom reyndar í kjölfar draumsins um að við værum orðnir bestu vinir, ég og Silvio Berlusconi, forsætisráðherra Ítalíu og æðsti prestur hjá AC Milan. Hann vildi allt fyrir mig gera, var að reyna að sannfæra mig um að það væri gáfulegra að halda með Milan heldur en Juventus, en ég gaf mig ekki. Var reyndar alltaf að reyna að hringja í vbv, ætlaði að kynna hann og Berlusconi og komast heim, en hann svaraði aldrei. Berlusconi var samt skemmtilegri en ég hafði ímyndað mér.

Þetta er bara gert...

2006-02-17T13:39:00.000Z

...til að losna við áreiti.

4 störf sem ég hef unnið við um ævina:
- Kjötvinnsla...borða ekki bjúgu eftir það.
- Garðrækt...fegurð Akureyrar er mikið til mér að þakka.
- Fiskvinnsla...ógleymanlegt í mikilfengleik sínum.
- Sjómennska...bæði sumarskot og Flæmski hatturinn.

4 bíómyndir sem ég gæti horft á aftur og aftur og aftur:
- Pulp Fiction...þarf ekki frekari skýringar við.
- Með allt á hreinu...nýir fletir við hvert áhorf.
- This Is Spinal Tap...misskilið meistaraverk.
- Godfather...helst öll serían.

4 staðir sem ég hef búið á:
- Núpur, Dýrafirði.
- Kaupmannahöfn (og Árósar og Helsingör).
- Angelica, NY.
- Dalvík...sælureiturinn sjálfur!

4 sjónvarpsþættir sem mér líkar:
- Cheers.
- Boston Legal...William Shatner verður betri með aldrinum.
- 24.
- Saga mannkyns.

4 staðir sem ég hef heimsótt í fríum:
- Mallorca
- Costa Del Sol
- Kaupmannahöfn
- Suðurlandsundirlendið...að mörgu leyti skemmtilegasta fríið!

4 síður sem ég skoða daglega (fyrir utan blogg):
- www.hoopshype.com
- www.newsnow.co.uk
- www.ruv.is/poppland
- www.xfm.is

4 matarkyns sem ég held upp á:
- Kínamaturinn hennar mömmu.
- Fiskibollurnar hennar mömmu.
- Flatbaka
- Sub-samlokan í kaupfélagssjoppunni í Angelica.

4 bækur sem ég les oft:
- Kiss: Behind the Mask - The Official Authorized Biography.
- Íslensk orðsnilld.
- Hitchikers Guide To The Galaxy
- Að elska er að lifa - Gunnar Dal

4 staðir sem ég vildi heldur vera á núna:
- Dalvík
- Old Trafford
- Madison Square Garden
- Delle Alpi

...og hana nú!

Svona lítur hann út.

2006-02-16T16:06:00.000Z

Var að vafra á netinu og fann mynd af Guði.

Mig langar í nýja Juventus-treyju.

Ég er að spá í...

2006-02-15T14:43:00.000Z

...að gefa blogger annan séns. Það er eitthvað í sambandi við það að þurfa að borga fyrir bloggsíðu sem fer í taugarnar á mér. Kannski er maður orðinn of góðu vanur.
Svar mitt við birtingatregðu bloggersins er, eins og áður, þögnin ein. Í svekkelsi mínu hef ég ekki komið nálægt blogger í nokkra daga. Það versta við þetta er að bloggernum gæti ekki verið meira sama...ergó...þögnin þjónar nákvæmlega engum tilgangi. Í þessu tilviki.

Ég er kannski óheyrilega viðkvæmur og smámunasamur, en undanfarna daga hafa málvillur í auglýsingum farið alveg hrikalega í taugarnar á mér. Eru auglýsingar aldrei prófarkalesnar?
Ég átta mig t.d. ekki á því að menn skilji ekki muninn á móttökum og viðtökum. Ónefnt fyrirtæki er þessa dagana að þakka þeim sem heimsækja vefsíðuna þeirra fyrir móttökurnar. Ekki gott.
Martin Lawrence nær nýjum hæðum í einhverri bíómynd, sem ég man ekki einu sinni hvað heitir, því þar leikur hann hrokkagikk! Þetta hlýtur að vera nýtt afbrigði gamanleiks. Ég ætla aldrei að vera hrokkagikkur.
Það að kominn sé tími á eitthvað merkir að það sé orðið úrelt eða úr sér gengið og kominn tími til að skipta því út eða endurnýja. Mér hrýs hugur þegar ég er spurður hvort ekki sé kominn tími á hamborgara. Sá borgari getur ekki verið góður. Jafnvel þótt hann beri erlent nafn.

Annars er allt gott bara. Fyrir utan þetta vesen þarna með geislaspilarann í bílnum. Tölvan er komin í lag. Geisladrifinu þar var bara skipt út. Ég á ekki von á því að fá sömu þjónustu varðandi bíltækið.

Hafði það loksins af að kíkja til sjúkraþjálfara. Hnéð hefur ekki verið að gera neitt sérlega gott mót upp á síðkastið og ég er reyndar farinn að beita líkamanum svo kolvitlaust að í myrkri yrði ég líklega tekinn í misgripum fyrir dýr í útrýmingarhættu. Svo fer mann bara að verkja út um allt þegar maður gengur eins og bjáni. Þetta horfir til betri vegar. Valdi reddar því. Meðmæli ef óskað er.

Eitt að lokum. Ég er algjörlega og alfarið hættur að bora í nefið. Ekki það að ég hafi lagt einhvern sérstakan metnað í þá athöfn og líklega á ég ekkert eftir að sakna þess. Vil bara ekki enda svona...

Æ!

2006-02-07T18:15:00.000Z

Sumir skitu á sig í Kastljósi í gær. Það þýðir ekkert að leggja fram kæru og segja "reglur eru reglur og þeim verður að fylgja" og verja það svo að eitt laganna sé of langt og að öðrum hafi ekki verið skilað inn á tilsettum tíma. Það eru augljóslega brot á reglunum. Skeina.

Síðustu dagar hafa snúist um veikindi dætranna, snúning í Perlunni, bilaðan geislaspilara og bilað geisladrif. Að ógleymdum hinum víðfeðmu, ókönnuðu lendum óteljandi sjónvarpsrása.
Sara Líf og Inga Rún eru búnar að liggja veikar meira og minna síðustu daga, Sara er reyndar komin á ról og tekur því fagnandi. Hún reyndi hvað hún gat að komast út til að hitta vinkonurnar á meðan veikindin stóðu sem hæst, heimtaði m.a.s. að fara í skólann sem staðfesti það endanlega að hún var með óráði. Inga Rún er öllu rólegri í tíðinni og hresstist lítið eitt þegar hún eignaðist webcam. Ég er eiginlega á því að fá mér aldrei svoleiðis tæki. Friðhelgi einkalífsins er mér dýrmætari en svo.
Snúningurinn í Perlunni fór ekkert sérlega vel í Stjána bró, ókrýndan Evrópumeistara í bloggi(maður þarf eiginlega að fara að taka sér veikindafrí til að komast yfir allar þessar færslur hans). Stórfjölskyldan fór í Perluna á laugardaginn til að fagna öllum afmælisdögunum sem ryðjast yfir okkur í byrjun febrúar ár hvert; mamma varð sextug á miðvikudaginn var, snorrinn varð #) ára á laugardaginn og Stjáni verður 26 ára á fimmtudaginn næsta. Þetta var bara ljómandi gott. Maturinn góður, alveg við það að vera frábær, og snúningurinn er athyglisverður. Stjána varð reyndar hálf óglatt og skipti um sæti. Við náðum heilum hring.
Geislaspilarar og drif eru ekki bestu vinir mínir þessa dagana. Fyrst "hvarf" geislaspilarinn í Skódanum. Ég get hlustað á útvarpið, nó prob. Tækið bara kannast ekki við það að í því sé geislaspilari. Pirrandi. Til að toppa þetta tók geisladrifið í tölvunni upp á nákvæmlega því sama! Jújú, drifið er þarna og tölvan kannast alveg við það, hún bara vill ekki sækja gögn af diskum! Ég er búinn að taka fyrsta skrefið í átt að bættu ástandi tölvunnar, hef ekki haft mig í það ennþá að láta kíkja á bíltækið. Geisladrifið fór í skoðun í dag, en þeir gleymdu að segja mér að þeir lokuðu klukkan 5! Ég hringdi til að kanna stöðu mála og gerði mér vonir um að sækja gripinn á heimleiðinni, en tölvukonan sagði mér að það væri búið að loka. Ég gat að vísu pantað einhverja tækniaðstoð með því að ýta á tvo, en hún kostar 34 þúsund krónur fyrir utan vask! Einmitt.
Erlendu sjónvarpsstöðvarnar eru þess valdandi að ég hef farið frekar seint að sofa upp á síðkastið. Ég er reyndar svolítið fyrir það að vaka lengi, Sunnuhvolsættin sjáðu til, sem þýðir að þegar ég segi að ég fari seint að sofa þá er það virkilega seint. Jafnvel svona um það leyti sem einhver hluti þjóðarinnar er að fara á fætur. Sem er þá eiginlega orðið snemma.

Blogger er farinn að fara í taugarnar á mér aftur. Hann birtir ekki pistla nema þegar hann er í stuði og svo er orðið lífsins ómögulegt að birta myndir. Ég er búinn að finna mér annað heimili, mér sýnist ég reyndar þurfa að borga eitthvað fyrir það og er ekki alveg í þeim pakka. Þekkir maður ekki mann sem þekkir mann?

Poeta nascitur, non fit

2006-02-06T14:31:00.000Z

Ég ákvað að taka ekki afstöðu til stóra Sylvíu-málsins. Þannig lagað. Ég þekki málsaðila beggja vegna borðsins og það flækir málin talsvert. Skil skáldið upp að vissu marki. Finnst þetta samt hálf kjánalegt. Lagið er hins vegar glimrandi skemmtilegt og á allt það besta skilið. Það sama verður sagt um söngkonuna, sem á líklega eftir að setja ný viðmið hvað frægð og frama varðar.
Annars er ég orðinn heldur dofinn gagnvart þessum söngvara- og lagakeppnum, hef eiginlega ekkert séð af Evrópusjóninni og legg mig ekkert sérstaklega eftir ædolinu. Ég hef það á tilfinningunni að dómararnir þar séu að hlusta á eitthvað allt annað en ég. Það er ekki verið að gera ungu fólki neinn greiða með því að láta það gera sig að fífli fyrir framan alþjóð í hverri viku.

Ég skemmti mér betur en oftast áður yfir Super Bowl, úrslitaleiknum í ameríska fótboltanum. Horfði á herlegheitin á France 2, sem eins og nafnið gefur til kynna er frönsk sjónvarpsstöð. Það jók menningarlegt gildi upplifunarinnar talsvert að heyra þulina segja "oooolala" og "magnifique" með reglulegu millibili. Þetta var nokkurn veginn það eina sem ég skildi þótt ég hafi numið franska tungu hjá fyrrverandi menntamálaráðherra, Tómasi Inga Olrich, og teljist stúdent í faginu. Ég kann að segja hægri og vinstri. Og bíll. Það hefur líklega haft sín áhrif á ástundun og árangur að franska var oftar en ekki fyrsti tími á morgnana og þá fengum við Offi og Berti okkur fyrsta skammtinn af Snuff no.99. Fyrstu kennslustundir dagsins voru oftar en ekki nokkuð þokukenndar.

Drífa sig svo inn á www.xfm.is og greiða atkvæði!

Afmælisbarn dagsins!

2006-02-01T19:57:00.000Z

Móðir mín elskuleg á afmæli í dag. Stórafmæli. Inga Snorra er sextug.

Þetta er kannski ekki besta myndin sem tekin hefur verið af afmælisbarninu, en hins vegar má glögglega sjá á myndinni ljómann sem umlykur hana við leik og störf sérhvern dag.

Mamma er best og væru allar konur heimsins eins og hún værum við í talsvert betri málum.

Nú er gaman...

2006-01-31T17:33:00.000Z

...að vera Íslendingur. Og íþróttaáhugamaður. Og eiga gamla landsliðsbúninga.

Þetta er ósvikin vara. Ég á tvær Valda Gríms-treyjur og er stoltur af.
Það vita það nefnilega ekki allir, en klæðnaður almennings á leiktíma hefur mikli áhrif á gang mála í kappleikjum. Jafnvel þótt leikirnir fari fram á erlendri grundu. Sérvaldar stellingar í sófa eða sjónvarpsstól hafa ekki alveg sömu áhrif, eins og bakeymsli Offa vinar míns bera glögglega með sér. Þrátt fyrir sérvaldar stellingar vann Man.United ekki alla leiki.

RÚV á hrós skilið fyrir að gera EM ágæt skil. Ég hef ákveðið að vera jákvæður og sleppa öllum aðfinnslum. Gæti reyndar tínt til nokkur atriði sem mér finnst aðfinnsluverð, en læt það vera. Á meðan gleðin yfir árangrinum svífur yfir vötnum legg ég aðfinnslur til hliðar. Það er kannski merki um breytt landslag á fjölmiðlamarkaði, og þá á ég við tækniframfarir og fjölda erlendra stöðva sem hægt er að horfa á hér heima frekar en innbyrðis samkeppni innlendu stöðvanna, að nú sér maður á skylduáskriftinni aðra leiki en þá sem íslenska liðið spilar. Í talsverðum mæli. Mjög gott mál.

Talandi um sjónvarp...ég var loksins að verða mér úti um erlenda pakkann á Breiðbandinu. 63 stöðvar. Svefn er ofmetinn. Það tók reyndar sinn tíma að fá þetta í gegn. Vegna tengslanna í gegnum Enska boltann velktist málið á milli skrifborða hjá ónefndu stórfyrirtæki sem einbeitir sér að síma- og sjónvarpsmálum. Allt er þó gott sem endar vel og áður en langt um líður get ég komið á framfæri meðmælum og ábendingum um gott sjónvarpsefni á þessum erlendu stöðvum. Bíð sérlega spenntur eftir því að leggjast yfir íþróttarásirnar, ameríska háskólakörfuboltann, íshokkí, háskólafótboltann og svo mætti lengi telja.

Mæli svo eindregið með því að fólk fylgist vel með Tónlistarverðlaunum X-FM. Hátíðin sjálf fer fram í Austurbæ 23.febrúar. Tilnefningar verða opinberaðara á sextugsafmæli mömmu, 1.febrúar. Dagsetningin var valin af kostgæfni. Tilnefningar verða til skoðunar og kosningar á xfm.is. Við vorum að opna nýja síðu, erum ekki alveg komnir með stýrikerfið á hreint ennþá, en það gerist fyrr en seinna.

Svo er ekkert ýkja langt í næstum-því-stórafmæli. 39 er góð tala. Laugardagur er góður dagur. Pakkar, heillaóskir og peningagjafir vel þegnar.

Nei!

2006-01-25T17:45:00.000Z

Það er ekki búið að loka síðunni. Vörðurinn er bara búinn að vera upptekinn. Og búinn að lenda í vandræðum með að birta pósta heima. Beinirinn. Þetta er allt honum að kenna.

Komst að því mér til ómældrar gleði að bíllinn minn heitir sama nafni og fyrstu Skodarnir sem ég man eftir. Sem voru kostagripir...eins og nafnar þeirra í dag.

Skoda Octavia...tímanna tákn.

Það er sko...

2006-01-12T16:38:00.000Z

...verið að breyta henni í gufubað! Með sturtu.

Svona er Ísland í dag!

2006-01-12T15:06:00.000Z

Ég má nota þennan frasa. Ég var viðstaddur fæðingu hans. Jón Ársæll á frasann skuldlaust. Þegar hann tók við síðdegisþættinum á Bylgjunni í árdaga frjáls útvarps á Íslandi vantaði nafn á þáttinn. Hann vildi ekki nota Reykjavík síðdegis. Skiljanlega. Nýr þáttur, nýr maður, nýtt nafn. Eftir mikil heilabrot og pælingar fæddist Ísland í dag. Sem útvarpsþáttur. Strax í lok fyrstu kynningar í fyrsta þætti hallaði Jón Ársæll sér að hljóðnemanum og hvíslaði á sinn einstaka hátt "svona er Ísland í dag."

Þessar myndir eru teknar um borð í Skoda á ferð um höfuðborgarsvæðið með nokkurra klukkustunda millibili.

Þetta er fáránlegt. Ég lagðist til svefns í gærkvöldi í þeirri fullvissu að dagurinn í dag yrði snjókalladagur með tilheyrandi umferðarteppu og skemmtilegheitum. Það var hríð, við norðanmenn köllum þetta reyndar muggu, og á vegi mínum urðu tveir skaflar sem ég tók hreinlega á ferðinni. Þegar ég kom út í morgun...púff. Snjórinn horfinn. Ég held að veðurguðirnir líti á Ísland annað hvort sem tilraunaverkefni eða þá að þeir kasta á okkur veðri af algjörri tilviljun í kaffipásum. Svona eins og aðrir fletta í gegnum blöðin. Annars hugar.

Hvernig...

2006-01-12T14:35:00.000Z

...getur fólk látið sér detta það í hug að verja gjörðir DV og fréttastefnu? Þetta virðist reyndar vera bundið við fólk sem tengist sneplinum beint eða óbeint. Mér er sama. Það á ekki að vera hægt að verðleggja siðferðisvitund og almenna skynsemi og leggja til hliðar ef rétta upphæðin rúllar inn á reikninginn um hver mánaðamót. Ritstjórarnir skitu á sig í sjónvarpinu í gær. Samkvæmt þeirra skilgreiningu gengur fréttamennska á Íslandi almennt út á það að sýna virðingu og nærgætni. Þeir eru þeir einu sem segja fréttirnar eins og þær eru. Ætlast þessir menn til þess að tekið sé mark á þeim? Það eru til óteljandi dæmi þess að þeir gangi of langt, fari með ósannindi og hreinlega leggi fólk í einelti. Á þetta að heita fréttamennska? Mér blöskraði hvernig annar ritstjóranna var algjörlega úti á túni í sjónvarpsviðtali í gær. Hann var eins og óþekkur tíundubekkingur sem stóð sig ekki nógu vel á samræmdu prófunum og gat eiginlega ekki gefið skýringar á þessari döpru frammistöðu. Hinn ritstjórinn var augljóslega búinn að gera það upp við sig að hinn látni væri sekur og að þar með væru gjörðir þeirra réttlætanlegar. Það vottaði ekki fyrir því að framsetning fréttarinnar, og frétta almennt í þessu svokallaða dagblaði, væri að vefjast fyrir honum. Fyrst kvartendur voru fleiri en einn og fleiri en tveir hlyti að vera sannleikskorn í ákærunum! Þar með er þetta í lagi. Hrokinn, vanvirðingin og yfirlætið valda manni ógleði. Líkamlegum einkennum. Ekki yfir sekt eða sakleysi hins látna, ekki yfir hugsanlegum þolendum. Yfir þeirri staðreynd að DV leiddi til dauða manns og forráðamenn blaðsins virðast vera stoltir af frammistöðunni.

Nú er nóg komið!

2006-01-10T18:11:00.000Z

Ég átti í athyglisverðum samræðum um siðferði í íslenskri blaðamennsku í gær. Þetta snérist einkum og sér í lagi um siðferðið á ristjórn eins dagblaðanna, DV. Ég er þeirrar skoðunar að stefnan þar sé kolröng, það má reyndar hugsa sér miðil sem einmitt "þorir þegar aðrir þegja", en hins vegar getur þessi miðill ekki leyft sér að setjast í sæti kviðdóms og dómara. Hann getur ekki leyft sér að birta sögusagnir og hálfkveðnar vísur. Þar með er trúverðugleikinn fokinn út um gluggann og velvildin sömuleiðis. Það hefur gerst á DV, hvað sem hver segir. Það þekkja eða kannast flestir við einhvern eða einhverja sem hafa verið til umfjöllunar í þessu sorpblaði og sjaldnast er farið með rétt mál. Viðtöl eru hreinlega samin og ályktanir dregnar án þess að allar hliðar viðkomandi máls séu skoðaðar.
Það hitti þá þannig á að daginn eftir þetta ágæta samtal dregur forsíðufrétt DV dilk á eftir sér. Það hlaut að koma að þessu. Nú hreinlega hljóta menn að fara að hugsa sinn gang. Kannski ekki. Miðað við fyrri afrek er það kannski einum of að ætla þessum mönnum einhvern vott af siðferðiskennd. Eða samúð. Hversu oft hafa þeir (og þær) framið mannorðsmorð í þeim tilgangi einum að "hrista upp í hlutunum", vekja athygli og gera óheiðarlega tilraun til að selja blöð? Dæmin eru óteljandi. Það ber ekki alveg jafnmikið á leiðréttingum þegar hið sanna kemur í ljós. Á sínum tíma settu DV og Fréttablaðið sér siðareglur sem áttu að taka siðareglum Blaðamannafélags Íslands fram. Það plagg er álíka mikils virði og blöðin á botninum í fuglabúrinu. Nei annars. Blöðin í fuglabúrinu hafa hlutverk og skila árangri.
Álit mitt, og væntanlega fleiri, á blaðamönnunum sem þarna starfa er ekkert. Það er bara ekki til staðar.
Nú hljóta landsmenn að taka höndum saman og hreinlega hætta að kaupa blaðið, hætta að lesa það (ef þeir þá hafa gert annað hvort) og neita "blaðamönnum" snepilsins um viðtöl. Þeir hafa reyndar ekki látið viðtalaskort stoppa sig hingað til. Þeir hafa bara fyllt í eyðurnar. Ef menn og konur neita blaðamönnum um viðtöl er verið að senda skýr skilaboð og fyrr en seinna hætta þeir þessum óskapnaði. Það nennir enginn að lesa eyðublöð. Það ætti reyndar enginn að nenna að lesa þennan klósettpappír sem kallar sig dagblað.

Aðstandendur mannsins sem er á forsíðu DV í dag og galt fyrir það hinum dýrasta dómi eiga samúð mína alla.

Beatus!

2006-01-10T17:10:00.000Z

Ég hef undanfarna daga barist við undarlega tiktúrur í tölvunni minni. Hún átti það til að láta hluti hverfa af skjánum, eða jafnvel birta eitthvað sem ég vissi að var til staðar í tölvunni, neita því alfarið að keyra ákveðin forrit og fleira skemmtilegt. Spakir menn voru búnir að ráðleggja mér hitt og þetta, en lokaniðurstaðan virtist oftast vera sú að strauja vélina. Keyra stýrikerfið inn aftur og afmá allar eldri syndir. Þetta er tiltölulega stór aðgerð og getur farið illa, en frekar en að borga tugþúsundir fyrir ákvað ég að gera þetta bara sjálfur. Vippaði mér inn í ónefnda raftækjaverslun og keypti flakkara, sem er reyndar stórsniðugt fyrirbæri. Nú á ég helling af gögnum og dóti inni á hörðu drifi sem er álíka stórt fyrirferðamikið og fyrstu gsm-símarnir.
Það er skemmst frá því að segja að straujunin gekk vonum framar. Hún tók að vísu sinn tíma og kostaði mig mikil heilabrot og pælingar...en það hafðist. Uppskeran er óaðfinnanleg tölva, nánast eins og ný. Gleði mín er fölskvalaus.
Gerði reyndar þau "mistök" að gera tölvuna leikjalausa. Eða því sem næst. Leikirnir eiga heima í PS2. Mistökin liggja í því að PS2 hefur sjaldan eða aldrei þurft að þola annað eins álag. GTA er að gera mig vitlausan. Mér illt í þumalputta vinstri handar.

Gleði mín yfir tilburðum Tuma litla við hátíðarkræsingarnar er líka mikil og innileg. Hann er reyndar ofalinn hjá mömmu og pabba, er farinn að haga sér eins og "sá útvaldi" og réðist m.a.s. á kött þegar við fórum í göngutúr fyrir skemmstu. Tumi heldur stundum að hann sé mennskur og honum finnst t.d. mjög eðlilegt að hann sitji til borðs með öðrum á matmálstímum.

Þetta, þ.e.a.s. tilburðir Tuma við hangikjötið, er reyndar ekki daglegt brauð. Hann fékk að ganga aðeins lengra en venjulega í þetta skiptið. Mér fannst þetta reyndar svo fyndið að ég átti erfitt með að munda símann/myndavélina.

Svona til að svara fjölmörgum fyrirspurnum...skeggið blívur. Um óákveðinn tíma. Tilgangur þess er líka margþættur. Skegg getur nefnilega falið ýmislegt. Mig dreymdi fyrir skemmstu að ég væri búinn að raka mig og ég held að mér sé óhætt að flokka þann draum sem martröð. Ég sé líka fram á það að með þessu áframhaldi verð ég orðinn fullgildur meðlimur í Hjálmum áður en langt um líður.

Kannski er þetta leiðin...

2006-01-03T16:21:00.000Z

...til þess að auka vinsældir golfíþróttarinnar. Eins og þessu þurfi eitthvað sérstaklega! Þetta kæmi sér reyndar vel fyrir mig og vbv, sem höfum lagt fuglalíf í Mosfellsbæ í hættu og lækkað fasteignaverð í kringum golfvöllinn stórlega.

Rakst á þessa skilgreiningu á einu elsta vandamáli heimsins. Það er margt hérna sem fær mann til að sjá hlutina í nýju ljósi!

Kvennamál:
Já = Nei
Nei = Já
Kannski = Nei
Mér þykir það leitt = Þér mun þykja það leitt
Við þurfum = Ég vil
Það er þín ákvörðun = Þú munt gjalda fyrir þetta seinna
Við þurfum að tala saman = Ég þarf að kvarta
Gjörðu svo vel = Ég vil það ekki
Ég er ekki í uppnámi = Auðvitað er ég í uppnámi fíflið þitt!
Það er naumast þú ert elskulegur í kvöld = Hugsaru ekki um annað en kynlíf?
Elskar'u mig? = Ég er að fara að biðja þig um eitthvað dýrt
Hversu heitt elskarðu mig? = Ég gerði dálítið sem þér mun alls ekki líka
Þú verður að læra að tjá þig = Vertu bara sammála mér
Ekkert = Allt
Ekkert, í alvöru = Það er bara að þú ert svoddan fífl

Karlamál:
Ég er svangur = Ég er svangur
Ég er þreyttur = Ég er þreyttur
Viltu koma í bíó = Mig langar til að sofa hjá þér
Má ég bjóða þér út að borða = Mig langar til að sofa hjá þér
Má ég hringja í þig einhvern tíma = Mig langar til að sofa hjá þér
Má ég fá þennann dans? = Mig langar til að sofa hjá þér
Hvað er að? = Ég skil ekki af hverju þú ert að gera svona mikið úr þessu
Hvað er að? = Ætli kynlíf sé ekki út úr myndinni í kvöld?
Mér leiðist = Langar þig að sofa hjá mér?
Ég elska þig = Gerum það núna
Ég elska þig líka = Ok, ég sagði það...við ættum að gera það núna!
Tölum saman = Ég er að reyna að heilla þig með því að sýna þér að ég er góður persónuleiki og þá kannski myndirðu vilja sofa hjá mér
Viltu giftast mér? = Ég vil koma því þannig fyrir að það sé ólöglegt fyrir þig að sofa hjá öðrum mönnum

Árið!

2006-01-03T14:13:00.000Z

Svona litu áramótin út í Breiðholtinu. Myndirnar voru reyndar teknar rétt rúmlega hálftólf á gamlárskvöld, sem var líklega eins gott. Örfáum mínútum eftir myndatökuna hvarf borgin í rakettureyk og fólk lenti í vandræðum með að rata heim til sín.

Íslendingum tókst að puðra upp 600 tonnum af flugeldum. Verðmætin eru 500 milljónir. Það er hálfur milljarður. Peningarnir fuku í orðsins fyllstu merkingu út í loftið. Sjálfsagt hafa einhverjir, einkum karlmenn á miðjum aldri, fengið andlega fullnægingu út úr þessu, en ég hef prívat og persónulega aldrei kveikt á þessari rakettudellu og tel það vel heppnuð áramót ef ég kemst hjá því að senda seðlana á flug.
Hins vegar er ég með ágæta hugmynd sem ég er að hugsa um að hrinda í framkvæmd um næstu áramót. Ég ætla að stofna sérstakan sjóð, Styrktarsjóð Snorra Sturlusonar, og biðla til þjóðarinnar. Ég ætla að biðja samlanda mína að leggja 100 krónur í þennan sjóð fyrir hverjar 1000 krónur sem þeir eyða í flugelda. Ég geri mér ágætar vonir um viðtökur og geri fastlega ráð fyrir því að fagna árinu 2007 með 35-40 milljónir inni á bankareikningnum mínum. Þegar menn eru komnir á flug í flugeldakaupum sjá þeir nefnilega auglýsingu um Styrktarsjóð Snorra Sturlusonar, telja nokkuð víst að fara eigi að vinna einhvers konar endurbætur í Reykholti og leggja góðu málefni lið. Þeirra misskilningur. Ég er ekki að ljúga neinu.
Þetta er endurbætt útgáfa hugmyndar sem ég fékk þegar ég var um tvítugt. Það er býsna langt síðan. Þá ætlaði ég að stofna þennan sama sjóð, Styrktarsjóð Snorra Sturlusonar, og senda gíróseðla inn á öll heimili í landinu. Ég gerði ráð fyrir ágætum heimtum, í ljósi þess að fólk teldi öruggt að heiðra ætti minningu skáldsins úr Reykholti eða eitthvað álíka, og sá fram á að ríkidæmi mitt myndi vaxa og dafna. Margt fer öðruvísi en ætlað er.

Skaupið var vont. Bara vont. Nokkrir ljósir punktar, eins og t.d. Björgvin Frans og Hjalli frændi, en engan veginn nógu gott til að vinna upp leiðindin. Fólk sem skemmti sér yfir þessu skaupi "af því að maður á alltaf að vera í góðu skapi á gamlárskvöld" er að misskilja þetta eitthvað.

Nei...það gat heldur ekki verið!

2005-12-29T16:21:00.000Z

Heimatengingin er ekki að gera sig. Mannauðsráðgjafi stjórnenda verður að fara að grípa í taumana. Eftir vísindalega rannsókn á fyrirbærinu er það óyggjandi niðurstaða sérvalinnar sérfræðinganefndar að vandamálið liggur hjá ráternum. Hann er bara að misskilja þetta. Þetta snýst ekki um álagstíma. Ég fór nefnilega heim til mömmu og pabba seint í gærkvöldi, þau eru sko kapaltengd, og þar var þetta engum vandkvæðum bundið. Bergele.
Eftir að hafa komist að því að ráterinn er ekki alveg á pari klæddi ég mig í skautabúninginn minn. Ég finn innri frið þegar ég fer í skautabúninginn. Hann er í fánalitunum. Ég fór út að fá mér ferskt loft, en vonbrigði kvöldsins voru u.þ.b. að yfirbuga mig, þannig að ég fékk mér sæti á næsta bekk. Þá vatt sér að mér bláókunnur maður í rauðum íþróttagalla, ekki eins flottum og mínum reyndar. Hann fór að hugga mig og tókst bara ágætlega upp. Ég tók gleði mína á ný. Að hluta til. Þetta var alveg stórskrítið.

Annars eru vandræði mín hjóm eitt miðað við það sem vbv er að ganga í gegnum. Hann pantaði sér nefnilega nýjan bíl frá útlöndum fyrir ekki svo margt löngu. Rétt fyrir jól var honum tilkynnt að bíllinn væri kominn til landsins og stæði á hafnarbakkanum. Skiljanlega var vbv mjög kátur. Svo kom nú í ljós að bíllinn er alls ekki kominn til landsins og í einu af fyrstu símtölum dagsins vegna þessa máls var honum tilkynnt að bíllinn kæmi í júní! Það er sjötti mánuður ársins. Næsta árs. Gleðin var takmörkuð. Eftir nokkur símtöl til viðbótar kom í ljós að bíllinn fór um borð í skip 21.desember. vbv spurði hvort hann væri í heimsreisu. Það horfir til betri vegar og áður en langt um liður verður vbv stoltur eigandi þessarar bifreiðar.

Eða ekki. Bíllinn hans er miklu flottari. Af jeppategund.

Held barasta...

2005-12-28T22:51:00.000Z

...að ég sé búinn að kippa bloggvandamáli heimilisins í lag. Hef ekki getað bloggað heima ansi lengi, blogger fæst hreinlega ekki til að birta neitt þrátt fyrir að ég sé að vinna á sömu tölvuna og venjulega og allt það. Tók mig til og keyrði einhverja uppfærslu á beininn. Ef Gulla er að standa sig í lykilstöðu sinni hjá Símanum virkar þetta. Hún er sko mannauðsráðgjafi stjórnenda. Eða mannauðsstjórnandi ráðgjafa eins og ónefndur aðili vildi meina. Sem væri reyndar mjög athyglisvert starf. Eini gallinn við þessa lykilstöðu Gullu er starfsheitið. Það þarf að fara á sérstakt námskeið til að læra að koma því almennilega frá sér.

Það eina sem talist getur jákvætt við kvöldið, hingað til, er ásýnd Óla Gunnars Solskjærs. Hetjan hugumstóra, bjargvætturinn í Barcelona, er mætt til leiks aftur eftir langvarandi meiðsli. Um tíma leit út fyrir að hann yrði að leggja skóna á hilluna...en nei. Norski snillingurinn gaf sig ekki. Hann kom inn á í annars óskemmtilegum leik Man.United og Birmingham City. Eftir leikinn fékk ég skilaboð frá Offa um að Fletcher og Smith væru rauða litnum til skammar. Hann vill frekar spila með 9 menn og tvo pappakalla heldur en að hafa þessar hetjur í liðinu. Engu að síður. Húrra fyrir Óla litla.

Að lokum þetta. Þeir sem ekki eru búnir að sjá Saw II í bíó ættu að drífa sig. Myndin kemur örugglega á dvd fljótlega, en það er satt best að segja hluti upplifunarinnar að finna hljóðbylgjurnar skella á sér í bíósalnum. Líklega væri hollast að horfa á fyrri myndina fyrst. Það vill svo skemmtilega til að ég á eitt eintak og vinir og vandamenn geta reynt að bjóða mér fallegar gjafir og/eða reiðufé í þeirri von að fá diskinn lánaðan. Leigðan. Horfa á Saw fyrst, sem allra fyrst, skella sér svo í bíó á Saw II. Alveg magnað fyrirbæri.

Jólin.

2005-12-27T16:08:00.000Z

Jú jú, þetta er búið að vera glimrandi gott. Góður matur, góðar gjafir, skemmtilegar stundir og allt það. Hápunkturinn er líklega sá að ég setti ný viðmið í ofáti. Á von á því að ég verði boðaður í viðtal, líklega í sjónvarpi, vegna þessa óvænta árangurs. Það er möguleiki að þetta verði fjölskylduviðtal, því dæturnar fengu fleiri jólagjafir en góðu hófu gegnir. Örugglega heimsmet.

Annars var ég að komast að því að jólasveinninn er í fínu djobbi. Þetta er tiltölulega stuttur álagstími, það er harla ólíklegt að kvartað verði undan störfum hans og vilji svo ólíklega til að einhver hafi út á eitthvað að setja bendir hann bara á mömmu sína! Ég er líka búinn að komast að því hvar hann dvelur 11 mánuði ársins og hvað hann er að dunda sér. Sönnunargagnið er eiginlega betra en astraltertugubb:

Í tilefni dagsins fljóta hér með tveir frekar góðir...

How many men does it take to screw in a light bulb? One ... men will screw anything.

How does a man take a bubble bath? He eats beans for dinner.

Glædelig Jul!

2005-12-22T17:57:00.000Z

Inga Rún tók í gær að sér hið vandasama hlutverk boðbera ljóss og friðar, algjörlega óumbeðin, og hóf að útdeila kossum.

Við Sara Líf höfum ekki undan neinu að kvarta. Er þetta ekki hinn eini sanni jólaandi?

Annars er margt að gleðja mig þessa dagana.
- Tölvan mín er ekki komin yfir móðuna miklu, eins og ég óttaðist á tímabili. Hún tók upp á því að birta bara það sem henni datt í hug í það og það skiptið, fór sér afar hægt og fleira skemmtilegt. Ég krukkaði eitthvað í henni, gæti líklega ekki endurtekið verknaðinn skref fyrir skref, og Ibba hresstist.
- Ónefndur íþróttafréttamaður gleður mig ósegjanlega fyrir hjartnæma hreinskilni á köflum. Hann á bara eftir að læra það að stundum verður maður annað hvort að beygja og sveigja sannleikann aðeins...eða hreinlega láta kyrrt liggja. Það er í rauninni dásamlegt að upplifa það að íþróttafréttamaður segi "ég hafði bara ekki tíma til að gera þetta í dag" og "ég bara hreinlega man ekki við hverja þeir voru að spila."
- Dagskrárstiklur Stöðvar 2 eru yndislegar. Ég fyllist kæti og gleði í hvert sinn sem þær birtast á skjánum. Bó segir manni að "besta dagskráin sé á Stöð 2" og bætir svo við..."Stöð 2 bíó sýnir í kvöld..." Það vantar bara að hann biðjist afsökunar á því að vera að minnast á þessa bíóstöð.
- Fjölgun vandaðra og athyglisverðra heimildarþátta um tónlist og tónlistarmenn á RÚV gleður mig mjög. Það er ekki ýkja langt síðan RÚV sýndi Smile, sem fjallar um Brian Wilson og Beach Boys. Algjörlega frábært efni. Efstaleitisgengið bætti svo rós í hnappagatið þegar það sýndi fyrri hluta Scorsese-verksins No Direction Home. Þessi magnaði leikstjóri er að fjalla um einn merkasta tónlistarmann samtímans, Bob Dylan, og síðari hlutinn verður sýndur í næstu viku. Gæsahúð.
- Íslensk tónlist. Það er gríðarlega margt spennandi í gangi. Ég hef verið að hlusta svolítið á Ampop og Dikta, Deep Jimi & The Zep Creams og Hot Damn!. Þetta er bara brotabrot af þeirri mögnuðu tónlist sem hreinlega hellist yfir okkur á þessum síðustu og verstu. Ísland er best í heimi!
- Bloggerinn. Virðist vera kominn í lag aftur. Búið að vera djöfullega erfitt að birta pistla upp á síðkastið. Ætli sé einhvers staðar til "grafreitur" óbirtra pistla á netinu?

Mæli svo með X-FM, enn og aftur. Það er dásamlegt að þurfa ekki að spila jólalög út í eitt. Almennt séð er bara gaman í vinnunni.

Geta ber þess...

2005-12-08T16:14:00.000Z

...sem vel er gert. Ég lenti í því á þriðjudaginn að það sprakk á Skodanum. Held að dekkið hafi bara ekki þolað allan þennan kraft og alla þessa vinnslu og ákveðið að ljúka ferlinum með dramatískum hætti. Ég eyddi þriðjudagskvöldinu meira og minna hundblautur og kaldur við dekkjaskiptingartilraunir. Eftir að ég hafði áttað mig á afar háþróuðu þjófavarnarkerfi felguboltanna stóð til að rífa veika dekkið undan...en það bara haggaðist ekki. Ég hélt fyrst að þetta væri annað hvort falin myndavél eða enn frekari þjófavörn. Þegar kuldinn var farinn að hamla heilbrigðri hugsun ákvað ég að leggja tólin frá mér og fá bílinn hennar mömmu lánaðan. Ég hringdi svo á hjólbarðaverkstæðið mitt morguninn eftir, Hjólbarðaþjónustu Hjalta, til þess að reyna að átta mig á því hvort aumingjaskapur minn væri algjör eða felgufestan ætti sér eðlilegar skýringar. Þá kom í ljós að þetta er mjöööög algengt með nýlega bíla á álfelgum; felgurnar hreinlega festast. Ég sá fram á það að þurfa að draga Skodann til Hjalta...en nei..."ég verð kominn til þín eftir fimm mínútur". Einn snillinganna á verkstæðinu mætti bara á svæðið og bjargaði málinu. Algjörlega frábær þjónusta sem bjargaði deginum. Hjólbarðaþjónusta Hjalta er í Hafnarfirði, svona fyrir þá sem ekki vita, og þjónustan þar er, hefur verið og verður frábær.

Annars er þetta bara tiltölulega rólegt. Ég tók reyndar eftir einu litlu atriði, mér til taumlausrar skemmtunar, núna eitthvert kvöldið. Ég á það til að vaka svolítið frameftir, það ku fylgja hinni rómuðu Sunnuhvolsætt, og sé því stundum dagskrárliði sjónvarpsstöðvanna sem aðrir missa af. Það er t.d. alveg glimrandi gott að ljúka deginum á svo sem eins og einum Staupasteini. Sýningartíminn er reyndar svolítið absúrd, en það er annað mál. Ég tók eftir því nefnilega að í lok flestra ef ekki allra dagskrárliða á S1 er sagt "farið ekki langt, hér rétt á eftir..." eða eitthvað í þeim dúr. Nema á eftir Staupasteini. Þá er maður ekkert hvattur til þess neitt sérstaklega að doka við. Enda bara Fasteignasjónvarpið í dagskrárlok. "Þetta er allt í lagi, þú getur farið að sofa núna."

Menn dagsins eru tveir. Báðir komnir yfir móðuna miklu. Báðir stórfenglegir tónlistarmenn. Megi Mark Chapman rotna í neðra og megi öll eiturlyf heimsins brenna til ösku.

Annar var skotinn til bana 8.desember 1980 og hinn var fæddur 8.desember 1943.

Fyndnasta mynd í heimi?

2005-12-06T17:14:00.000Z

Ég er búinn að horfa á þessa mynd annað slagið í allan dag og hlæ alltaf jafn mikið.

Annars liggja heilræði dagsins aðallega í því að mæla með hinnu merku útvarpsstöð X-FM 91.9. Ekki bara af því að ég vinn þar (!!!)...þetta hefur nú eiginlega meira með það að gera að ég er alltaf að hitta fólk sem hefur stillt yfir á X-FM og er alveg gapandi hissa. Stóð í þeirri trú að boðið væri upp á hávaða og læti, en kemst að því að þarna er spilað gæðarokk í sem víðustum skilningi. Led Zeppelin, The Smiths, Pink Floyd og svo mætti lengi telja.

Komst að því um helgina að hnéð er í betra ásigkomulagi en mig grunaði. Fór í keilu. Það er kannski ekki það sniðugasta sem maður gerir þegar maður er að jafna sig á krossbandarifu, liðbandaskemmdum og liðþófabrotthvarfi. Það hafðist samt. Spilaði 116, sem yfirleitt dugar til sigurs. Sara Líf tók sig hins vegar til og spilaði leik lífs síns, náði þremur fellum og lauk leik á 129. Það er algjörlega frábært. Hún vann einfætta manninn.

Fyndnasti maður dagsins er Valtýr Björn. Hann missir svolítið tengsl sín við samferðamennina þegar Milan á erfiðan og mikilvægan leik í vændum. Næstbesta lið Ítalíu er að fara að spila gríðarlega mikilvægan leik í Meistaradeildinni í kvöld og vbv tekur þetta mjög nærri sér. Reyndar svo að mig grunar að hann eigi hlut í liðinu. Hann er nefnilega ansi séður peningamaður. Áhyggjurnar yfir gangi mála í kvöld brjótast út í tímabærum og ótímabærum öskrum og yfirlýsingum, m.a. um kynhneigð þeirra sem næstir honum standa. Valtýr Björn er einn þessara manna sem litar tilveruna og gerir hana örlítið bærilegri.

Ákvað svo um helgina, í eitt skipti fyrir öll, að ég ætla aldrei...ég endurtek aldrei...að hafa afskipti af stjórnmálum. Skráði mig nú fyrir margt löngu sem félagsmann ónefnds stjórnmálaflokks, en það var nú mestmegnis til að hjálpa góðum manni í prófkjörsslag. Þurfti ekki að skrá mig aftur þegar ég ákvað að hjálpa öðrum góðum manni, fyrir ekki svo margt löngu, í svipuðum slag. Hefði kannski freistast til að skipta mér af málum fyrir hönd (ekki bláa!) þessa flokks, en ég er algjörlega hættur við. Stjórnmál á Íslandi eru bara plebbaskapur. Umræðuþættir helgarinnar sannfærðu mig um það í eitt skipti fyrir öll.

Þetta er nú bara fyndið.

2005-12-01T17:18:00.000Z

Fór á netflakk. Rakst á síðuna hans Jóns Kjartans frænda. Jón Kjartan er góður bassaleikari og hefur stytt mörgum Íslendingnum stundirnar með leik sínum og gamanmálum. Síðan hans lítur nánast nákvæmlega eins út og snorrinn! Margt er líkt með skyldum!
Mér datt í hug að athuga hvort ég fyndi mynd af Jóni Kjartani frænda á netinu. Gúgglaði hann. Fékk upp myndir af Jónsa, Georg og Kjartani í Sigurrós, Stefáni Jóni Hafstein, einhverjum körfuboltamönnum...og Birni Jörundi! Og fjölmargar myndir af framandi fólki. Meðal annars þessum hér.

Þetta er ekki Jón Kjartan. Bara alls ekki. Finnst það að sumu leyti illa gert að birta mynd af þessum manni og tengja hann nafni Jóns Kjartans.

Var að fá í hendurnar The Big´n Nasty Groove´O Mutha með Hot Damn. Loksins. Nú verður sko hlustað. Ég var nánast viðstaddur fæðingu Smára tarfs. Næstum því. Foreldrar hans bjuggu í næsta stigagangi við mig á Sólbakkanum í Köben. Þar kom Tarfurinn í heiminn. Í Kaupinhafn þ.e.a.s.

Í spilaranum eru annars Cynic Guru og Ampop, Dikta og Dimma. Stórskemmtilegt allt saman. Mér finnst alveg magnað að Hjalti litli sé stórsöngvari í rokksveit. Dimmu. Toppmaður. Var líka að fá í hendurnar Rarities með Stones. Þarf að gefa henni gaum.

Þetta er betra!

2005-12-01T14:38:00.000Z

Dreif mig í því í tilefni afmælis Gilbert O´Sullivan í dag að færa síðuna í nýjan búning. Gilbert var mikil hetja á sínum tíma, tryllti aðallega yngismeyjar enda snoppufríður maður með afbrigðum. Stærsta smellinn hans þekkja allir, Alone Again (Naturally).
Þetta er Gilbert.

Nei annars. Þetta er frekar til heiðurs hinum magnaða John Densmore, trommara Doors. Hann er 61 árs í dag. Densmore er/var frábær trommari og naut þess upp að vissu marki að standa í skugga Jim Morrison. Án hans hefði tónlist Doors líklega orðið hálfgert prump...bráðskarpur og hagmæltur söngvari og textasmiður með dösuðu undirspili.
Þetta er Densmore.

Þetta er nú samt allra mest til heiðurs einhverjum mesta bassasnillingi sem fram hefur komið fyrr og síðar. Jaco Pastorius. Hæfileikar hans og túlkun eru sprenglærðum tónfræðingum enn þann dag í dag til mikillar furðu. Kappinn átti reyndar við geðræn vandamál að stríða, einhvers staðar las ég fyrir margt löngu að hann hefði verið geðklofi, og hann lifði hratt. Drakk mikið. Tónlistarferilinn hóf hann sem trommari, en handarmeiðsli urðu til þess að hann tók upp bassann. Hann var svo flinkur að það hefur líkamleg áhrif á mann að hlusta á hann. Pastorius er líklega þekktastur fyrir leik sinn með Weather Report. Hann á t.d. gæsahúðarbassaleikinn í Birdland. Jaco Pastorius lést í september 1987, aðeins 35 ára að aldri. Dyravörður á næturklúbbi í Ft.Lauderdale barði hann í buff.

Opnun "nýrrar" síðu helst reyndar líka í hendur við stofnun eignarhaldsfélagsins Sturluson Entertainment Ltd. Það er ekki alveg útilokað að félagið verði skráð á markaði, en það fer reyndar eftir því hversu vel gengur að festa það í sessi á erlendri grundu. Það ætti nú ekki að vera neitt rosalega erfitt. Allra síst ef Stjáni bró leggur sig svolítið fram.

Í tilefni stofnunar Sturluson Entertainment Ltd. hefur svo verið ákveðið að leysa tíuþúsundusta gestinn á snorranum út með veglegum gjöfum. Nýi teljarinn, sem er miklu flottari og fullkomnari en sá gamli, sér um að halda utan um það. SLE kostar vinningana. Hugsanlega verða svo gestir verðlaunaðir fyrir komment. Nefndin er að vinna í málinu.